საპარლამენტო უმრავლესობის წევრის ზაზა პაპუაშვილის განცხადებით, უზენაესი სასამართლოს მოსამართლეთა შერჩევასთან დაკავშირებით პროცესები სამუშაო რეჟიმში უნდა გადავიდეს.
„ჩვენმა ფრაქციამ ინტერესი გამოხატა საკანონმდებლო ინიციატივის მიმართ, რაც ნაზი ჯანეზაშვილმა და ანა დოლიძემ გააჟღერეს. გვაინტერესებდა მათი აზრი და ეს იყო გაცნობითი ხასიათის შეხვედრა. ეს თემა სახალხო მღელვარების თემაა და გვინდა ხელი შევუწყოთ ისეთ გადაწყვეტილებებს, რომელიც კარგი იქნება ქვეყნისთვის და ეს ყველაფერი სამუშაო პროცესში გადავა”, – განაცხადა პაპუაშვილმა.
რაც შეეხება უზენაესი სასამართლოს უვადო მოსამართლეთა იმ ათკაციან სიას, რომელიც საბჭომ პარლამენტს წაუდგინა განსახილველად, პაპუაშვილი ამბობს, რომ ამ სიის წარდგენის წინააღმდეგი თავიდანვე იყო. მან ასევე ისაუბრა ეკა ბესელიასთან დაკავშირებითაც და აღნიშნა, რომ ბესელიას ხედვას იზიარებს, რომელიც უზენაესი სასამართლოს მოსამართლეთა სიას ეხება.
„ამასთან დაკავშირებით ჩემი პოზიცია მაშინაც განვაცხადე, რომ ამ ათკაციანი სიის წარდგენის წინააღმდეგი ვარ. ამ სიის წარდგენის პროცედურა როგორიც იყო, ამის წინააღმდეგი ვარ. აქ საუბარია, წარდგენის ფილტრზე, არჩევაზე, გამჭვირვალობაზე – ეს ყველაფერი უნდა იქნას გათვალისწინებული. ასევე უნდა ჩაერთოს სამუშაო ჯგუფი. ეკა ბესელიასთან დაკავშირებით კი რაც შემიძლია ვთქვა, ეს არის ჩემთვის ძვირფასი ადამიანი. თანამებრძოლები ვიყავით, პრინციპული ადამიანია. ბევრ საკითხებში მეც მაქვს რაღაც საკამათო მასთან, მაგრამ არის საკითხები, სადაც აბსოლუტურად ვიზიარებ მის აზრს და სულისკვეთებას. მესმის ერთი და იგივე განცხადებები და უმჯობესია, რომ ასეთი რამ აღარ იყოს, ხოლო პროცესი გადავიდეს სამუშაო რეჟიმში“, – განაცხადაზაზა პაპუაშვილმა.
პარლამენტში ფრაქციის „ქართული ოცნება – ძლიერი საქართველოსთვის” წევრები იუსტიციის უმაღლესი საბჭოს ორ არამოსამართლე წევრს, ანა დოლიძეს და ნაზი ჯანეზაშვილი შეხვდნენ. შეხვედრის საკითხი ის საკანონმდებლო წინადადებაა, რომლითაც ჯანეზაშვილმა და დოლიძემ პარლამენტს მიმართეს უზენაესი სასამართლოს მოსამართლეების არჩევასთან დაკავშირებით.