თელავის მუნიციპალიტერის სოფელ ყარაჯალაში რამდენიმე დღის წინ მოკლული 19 წლის რადიმ ყურბანობის ოჯახის წევრები და თანასოფლელები ამ წუთებში საპროტესტო აქციას მართავენ. ისინი მკვლელობაში ბრალდებულის ოჯახის სოფლიდან გასახლებას ითხოვენ, წინააღმდეგ შემთხვევაში მათი საცხოვრებელი სახლის გადაწვით და მკვლელობით იმუქრებიან.
შემთხვევა მიმდინარე წლის 1 თებერვალს ყარაჯალაში, მეჩეთის წინ , საღამოს მოხდა. ახალგაზრდა ცეცხლსასროლი იარაღიდან რამდენიმე გასროლით თანასოფლელმა მოკლა. გარდაცვლილის ახლობლები მკვლელობის მოტივად შურისძიებას ასახელებენ.
“10 წლის წინ გარდაცვლილი და ბრალდებული ერთად იყვნენ ცხვარში. დაკავებული ვინც არის იმან აიღო სანადირო თოფი და ჩემს ბიჭს უთხრა ყვავი უნდა მოგიკლაო. რადიმმა უთხრა ჩემები მეჩხუბებიან და ეს თოფი არ აიღოვო. ამ დროს თოფი გავარდა და დაკავებულის ძმა უბედური შემთხვევის შედეგად დაიღუპა. ოჯახმა ჩემს შვილზე შური იძია. უდანაშაულო იყო რადიმი. ამას არ შევარჩენთ, გადავწვათ მათ სახლს ან სოფლიდან წავიდნენ”- ამბობს გარდაცვლილის და რადმილა ყურბანოვი.
შემთხვევიდან რამდენიმე საათში 19 წლის ახალგაზრდის მკვლელობაში დამნაშევე პოლიციას საკუთარი ნებით ჩაბარდა. მომხდარზე დაწყებულია გამოძიება.