„ანაკლიის პორტის მასშტაბის პროექტები ისეთ ქვეყნებში, როგორიც არის საქართველო, ძირითადად კეთდება სახელმწიფოს მიერ“, – ამის შესახებ ეკონომიკისა და მდგრადი განვითარების მინისტრმა გიორგი ქობულიამ ჟურნალისტებს განუცხადა.
ეკონომიკის მინისტრის განმარტებით ამ შემთხვევაში, ხელისუფლებამ ეკონომიკის განვითარების მიზნით აღნიშნული პროექტის განხორციელება შესაძლებლობა კერძო სექტორს მისცა.
გიორგი ქობულიას თქმით, ნეგატიური ფონი რომელიც ბადრი ჯაფარიძისა და მამუკა ხაზარაძის გარშემო შეიქმნა, ინვესტორების მოზიდვას ართულებს, თუმცა კერძო სექტორმა თავისი ვალდებულებები უნდა შეასრიულოს.
„პროექტში სახელმწიფო ვალდებულებების გაჭიანურება დაკავშირებულია მხოლოდ იმასთან, რომ ჯერ ის მინიმალური საკუთარი კაპიტალი, რომელიც უნდა იყოს შეტანილი ინვესტორების მიერ, არ არის შეტანილი. ჩვენ დავიწყებთ და შევასრულებთ აბსოლუტურად ყველა ვალდებულებას, როგორც კი დავინახავთ, რომ მინიმალური კერძო კაპიტალი შეგროვდა და როგორც კი დავინახავთ, რომ ჩვენ მივიღეთ საფინანსო ინსტიტუტებისგან თანხმობა დაფინანსებაზე“, – აცხადებს მინისტრი.
მისივე თქმით, ანაკლიის პორტის შესრულების ვადების გადაწევა სახელმწიფოს მხრიდან ექვსი თვით ერთხელ უკვე განხორციელდა.
„დღესდღეობით შეიქმნა კითხვა – შეუძლია თუ არა სახელმწიფოს მისცეს გარანტია ტვირთებზე, ეს არ იყო თავიდან ხელშეკრულებაში, ამიტომ ჩვენ ძალიან ფრთხილად ვუყურებთ ამ წინადადებას. პრობლემა შეიქმნა იმიტომ, რომ ამ პროექტს ახორციელებს არა სახელმწიფო, არამედ კერძო ინვესტორი. ისევ ვიმეორებ, ჩვენ წავედით ამ ნაბიჯზე, რომ კერძო ინვესტორმა შეასრულოს ეს პროექტი იმ მიზეზით, რომ ჩვენი ეკონომიკა იყოს სრულიად კერძო სექტორზე დაფუძნებული. ეს არ იყო შეცდომა, ეს იყო გააზრებული სვლა, ჩვენ ვიცოდით, რომ ამასთან დაკავშირებით იქნებოდა განსაზღვრული პრობლემები, რომლებიც ჩვენ დავინახეთ, იმიტომ რომ კერძო სექტორს უჭირს ასეთი პროექტის დაფინანსება“, – აცხადებს გიორგი ქობულია.