ფინეთმა უარყო რუსეთის სავარაუდო მოთხოვნა, რომ უკრაინაში ომის დასრულების შესახებ მოლაპარაკებების ფარგლებში ქვეყანამ ნატო უნდა დატოვოს. ფინეთის თავდაცვის მინისტრის, ანტი ჰაკანენის განცხადებით, ფინეთის ალიანსის წევრობა მოლაპარაკების საგანი არ არის.
„ასეთი საკითხები არავითარ შემთხვევაში არ ექვემდებარება მოლაპარაკებას. რუსეთმა ეს იცის. ასეთი რამის შეთავაზებაც კი სრულიად აღმაშფოთებელია“, – განაცხადა ჰაკანენმა.
გერმანული გამოცემა „ბილდის“ ინფორმაციით, მიმდინარე კვირაში აბუ-დაბიში გამართულ მოლაპარაკებებზე რუსეთის მიერ წარდგენილი წინადადებები, სავარაუდოდ, ითვალისწინებდა ფინეთის ნატო-დან გასვლასაც.
უკრაინის პრეზიდენტმა, ვოლოდიმირ ზელენსკიმ განაცხადა, რომ რუსეთი ევროპაში უსაფრთხოების არსებული სტრუქტურის შეცვლას ცდილობს, რაც სახიფათოა. როგორც ზელენსკიმ ჟურნალისტებთან საუბრისას აღნიშნა, ბოლო მოლაპარაკებების დროს ამერიკულმა მხარემ წამოჭრა ევროპაში უსაფრთხოების სტრუქტურის შეცვლის საკითხი, რაც, მისი შეფასებით, რუსეთის ერთ-ერთი მთავარი მიზანია.
„რუსეთი, რა თქმა უნდა, ვერ მიიღებს გადაწყვეტილებებს ნატო-ს წევრი ყველა ქვეყნისა და მათი საზოგადოებების ნაცვლად. ის, რომ პუტინს სურს, ევროპაში საზღვრები შეცვალოს, ფაქტია. დარწმუნებული ვარ, ეს ევროპაში უსაფრთხოების გარანტიების გადახედვის მის კონცეფციას უკავშირდება. ეს სახიფათოა, რადგან, ჩემი აზრით, სწორედ მსგავსი საკითხები იწვევს ომს ან ესკალაციას“, – აღნიშნა უკრაინის პრეზიდენტმა.