საკონსტიტუციო სასამართლოს თავმჯდომარემ მთავარი პროკურატურის შენობა რამდენიმე წუთის წინ დატოვა, გიორგი პაპუაშვილი ირაკლი შოთაძესთან შეხვედრით კმაყოფილია და როგორც ის აცხადებს, შეხვედრამ კონსტრუქციულად ჩაიარა.
როგორც პაპუაშვილმა აღნიშნა, პროკურორისგან იყო საკმაოდ კონსტრუქციული მიდგომა, რომ იღებს პირადად პასუხისმგებლობას გამოძიების ობიექტურად წარმართვის შესახებ და მოსამართლე, რომელმაც გარკვეული ინფორმაცია მიაწოდა გამოძიებას, ასევე, მისი ოჯახის წევრები, დაცულები იქნებიან.
“ასევე, წავაყენეთ პრეტენზიები, რაც გვქონდა ჯერ კიდევ წელიწადნახევრის წინ, როცა ჩვენს წერილებზე არავითარი რეაგირება არ ყოფილა. მთავარმა პროკურორმა გვითხრა, რომ ამ საქმეში თავად გაერკვევა. თავად შოთაძე არ იყო მაშინ მთავარი პროკურორი. დამრჩა შთებეჭდილება, რომ ირაკლი შოთაძე მზად არის თანამშრომლობისთვის”– აღნიშნა გიორგი პაპუაშვილმა.
ამასთან, გიორგი პაპუაშვილის თქმით, თუ გამოკითხვა საჭირო იქნება, ამაზე შეთანხმება პრობლემას არ წარმოადგენს.
“მთავარია, სწორად წარიმართოს პროცესები და არავითარი კითხვის ნიშანი არ დარჩეს. ეს შედის არა მარტო ჩვენს ინტერესებში, არამედ, როგორც მთავარმა პროკურორმაც განაცხადა, ეს არის მათ ინტერესებშიც. დეტალებზე, რა თქმა უნდა, ვერ გესაუბრებით, რადგან ჩვენ სხვადასხვა საკითხებთან დაკავშირებით გვქონდა საუბარი. მე გარკვეული ინფორმაცია მივაწოდე, ოღონდ არა გამოკითხვის რეჟიმში, მათ შორის კერძო ბიზნესთან დააკავშირებით, რომელიც მოსამართლის ოჯახის წევრთან არის დაკავშირებული. შევხედოთ, გამოძიება როგორ წარმომართება, მე მაქვს იმედი, რომ არის გარკვეული წინაპირობები პრემიერთან შეხვედრის, პრეზიდენტთან შეხვედრის და მთავარ პროკურორთან შეხვედრის შემდგომ. დრო გვაჩვენებს, რამდენად ობიექტურად წარიმართება გამოხიება. ვფიქრობ, რომ ეს შემდეგ საჯაროც გახდება იქიდან გამომდინარე, რომ ყველას გვქონდეს ინფორმაცია. მთავარია, ვიზეც შესაძლო ზეწოლა ხორციელდება, იყოს ყოველმხრივ დაცული, რათა ითანამშრომლოს გამოძიებასთან. ამისათვის აუცილებელია ასევე საზოგადოების მხარდაჭერა”,-აღნიშნა გიორგი პაპუაშვილმა.