საქართველოს პრეზიდენტის პრესსპიკერმა ხატია მოისწრაფიშვილმა სომხეთში სალომე ზურაბიშვილის ოფიციალური ვიზიტი შეაჯამა.
“საქართველოს პრეზიდენტმა სომხეთში 13-14 მარტს ოფიციალური ვიზიტი გამართა და სომხეთის რესპუბლიკის უმაღლესი თანამდებობების პირებთან- პრეზიდენტთან, პრემიერთან, ეროვნული ასამბლეის პრეზიდენტთან და სომხეთის ეკლესიის მეთაურთან შეხვედრებზე საქართველო-სომხეთს შორის პარტნიორული ურთიერთობების განვითარების მნიშვნელობაზე ისაუბრა. მან მოლაპარაკებებისას ორი ქვეყნის განვითარებისთვის რეგიონში სტაბილურობისა და მშვიდობის მნიშვნელობაზე, კონფლიქტების გაწყვეტასა და გამოწვევებზე გამკლავების გზებზე ისაუბრა და აღნიშნა, რომ რეგიონში არსებული გამოწვევების გასამკლავებლად მთავარი და ერთადერთი, უალტერნატივო გზა საერთაშორისო სამართლებრივ ნორმებზე დაფუძნებული, მშვიდობიანი გზაა, რათა საბოლოოდ გადაწყდეს კონფლიქტები, რომლებიც ქვეყნების განვითარებასა და წინსვლას აფერხებს”, – აღნიშნა მოისწრაფიშვილმა.
მისი თქმით, ზურაბიშვილმა ისევე როგორც აზერბაიჯანში ვიზიტისას, სომხეთშიც საზღვრის დელიმიტაციის საკითხის გააქტიურების თემა წამოწია და აღნიშნა, რომ მეგობარ და მეზობელ ქვეყნებს შორის არ შეიძლება ეს პროცესი უსასრულოდ გრძელდებოდეს. „მისი თქმით, ახალი იმპულსი უნდა მიეცეს კომისიას და დაუბრუნდეს იმ შეთანხმებას, რომელიც სალომე ზურაბიშვილის საგარეო საქმეთა მინისტრობის პერიოდში იყო მიღწეული”, – განაცხადა პრეზიდენტის პრესსპიკერმა.
მან ასევე დასძინა, რომ ზურაბიშვილმა საქართველო-სომხეთს შორის კულტურის სფეროში თანამშრომლობის ხელშეკრულების განახლების საკითხიც დააყენა, რომლის მოქმედებასაც ვადა 2018 წელს ამოეწურა.