დეპუტატი ეკა ბესელია პარტია “ქართული ოცნების” თავმჯდომარის, ბიძინა ივანიშვილის გუშინდელ ინტერვიუს გამოეხმაურა. როგორც მან განაცხადა, ივანიშვილი გაბრაზებულია, რადგან მათი გაჩუმება ვერ მოახერხა.
მისივე თქმით, როდესაც საქმე ქვეყნის მომავალს, იდეალებსა და სამართლიანობას ეხება, ვერავის გამო გაჩუმდება.
„ჩემი გაჩუმება მიხეილ სააკაშვილმა ვერ მოახერხა მაშინ, როდესაც საბრალდებო სკამზე ერთ მხარეს სკოლის მოსწავლე შვილი მეჯდა და მეორე მხარეს – ძმა. ეს იყო სწორედ იმისთვის, რომ გავჩუმებულიყავი. ახლა ბიძინა ივანიშვილმა მოინდომა ჩემი გაჩუმება ხათრის გამო. უკაცრავად, როდესაც საქმე ამ ქვეყნის მომავალს, იდეალებსა და სამართლიანობას ეხება, მე შვილსა და ძმაზე ძვირფასი არავინ მყავს ქვეყანაზე და მათ გამო ვერ გავჩუმდი, ვერავის გამო გავჩუმდები. გაბრაზებულია და დღეს სხვაგვარად ჰყვება იმას, რაც, რეალურად, სხვაგვარად იყო. აქ ჩვენ ერთმანეთთან სასაუბრო ფუნდამენტი დავკარგეთ. ჩვენ დავრჩით იქ, სადაც ვიყავით და მან ნამდვილად შეიცვალა ხედვა“, – განაცხადა ეკა ბესელიამ.