“ამის აღიარების მრცხვენია და საკუთარ თავსაც ვაბრალებ”

“გუშინ ბიძინა ივანიშვილმა თავად აღიარა და წყალგამყოფი გაავლო, რომ მოძალადე მოსამართლეების, პროკურორებისა და პოლიციელების მხარეს დგას”, – ამის შესახებ დეპუტატმა ლევან გოგიჩაიშვილმა „ქართული ოცნების“ თავმჯდომარის, ბიძინა ივანიშვილის გუშინდელ ინტერვიუზე საუბრისას განაცხადა.
​დეპუტატი თავის თავსაც ადანაშაულებს იმაში, რომ სასამართლო რეფორმა შესაბამისად არ გახორციელდა.
„ივანიშვილი დღეს მოძალადეების მხარეს დგას და ზუსტად ამის გამო დავტოვეთ უმრავლესობა. მას უნდა, კონტროლის ქვეშ ჰყავდეს სააკაშვილისა და ადეიშვილის მემკვიდრეობა და უმრავლესობა სწორედ ამიტომ დავტოვეთ.
​როდესაც ვამბობდით, რომ ბიძინა ივანიშვილი დღეს ჩინჩალაძის, მურუსიძისა და ალანიას, ასევე, თეთრაძისა და სხვა ადამიანების მკვლელების, მოსამართლეებისა და პროკურორების მხარეს დგას, ადამიანებს არ სჯეროდათ. მაგრამ გუშინ თავად აღიარა ბიძინა ივანიშვილმა და წყალგამყოფი გაავლო, რომ მოძალადე მოსამართლეების, მოძალადე პროკურორებისა და პოლიციელების მხარეს დგას. დღეს ეს ადამიანები ისევ სისტემაში რომ არიან, მისი და მისი პოლიტიკის დამსახურებაა.
​დამთავრებულია, სასამართლო დღეს ხელისუფლების კონტროლის ქვეშაა.ამის აღიარების ძალიან მრცხვენია და საკუთარ თავსაც ვაბრალებ“, – განაცხადა ლევან გოგიჩაიშვილმა.
ცნობისათვის, გუშინ პარტია “ქართული ოცნების” თავმჯდომარემ, ბიძინა ივანიშვილმა ტელეკომპანია “იმედის” ეთერში, გადაცემაში “პირისპირ”, მოსამართლეთა უვადო დანიშვნის საკითხზე ისაუბრა. როგორც მან აღნიშნა, მურუსიძე-ჩინჩალაძის გვარებმა სწორედ იმიტომ წამოიწია წინ, რომ ისინი ერთ-ერთი პირველები იყვნენ, რომლებიც “ნაციონალური მოძრაობის” რეჟიმს დაუპირისპირდნენ.