დღეს არავინ ვაპირებთ აქ მტყუანისა და მართლის ძებნას, ყველა უნდა გავჩერდეთ, დავწყნარდეთ, დავმშვიდდეთ, – ამის შესახებ შინაგან საქმეთა მინისტრმა, გიორგი გახარიამ პანკისში, აქციის მონაწილეებთან შეხვედრის შემდეგ განაცხადა.
მისი თქმით, ამის შემდეგ გაირკვევა ვის შეეშალა და ვინ არის დამნაშავე.
„ამის შემდეგ უნდა გავარკვიოთ, სად შეგვეშალა, ვის შეგვეშალა, ვინ დამნაშავეა და ასე შემდეგ. დღეს როგორც უხუცესებთან ვისაუბრეთ, ახლა ვჩერდებით და ვაგრძელებთ საუბარს. თუ ვინმე გადავიდა და დაარღვია კანონი, ეს ცალკე სალაპარაკოა“, – განაცხადა გახარიამ.
რაც შეეხება ჰესის მშენებლობას, მისი თქმით, მშენებლები ადგილობრივებთან საუბარს განაგრძობენ.
„ჰესს რაც შეეხება, ამ ჰესის მშენებლები გააგრძელებენ თქვენთან ლაპარაკს და, რაზეც შეთანხმდება ადგილობრივი მოსახლეობა, ის გადაწყვეტილება იქნება მიღებული. ოღონდ მინდა, ერთი რამ იცოდეთ, რომ ქვების სროლა, გამოსავალი არ არის, ამიტომ ახლა უნდა დავმშვიდდეთ და დავწყნარდეთ, რომ გავაკეთოთ ის, რაც ჩვენს ძმობას, ურთიერთობასა და საუკუნოვან ისტორიას შეეფერება.
მადლობას ვუხდი ბრძენ ხალხს, რომლებმაც თავისი სათქმელი გვითხრეს. ჩვენც ჩვენი სათქმელი ვუთხარით. უახლოეს პერიოდში, ნახევარ საათში მოვლენ და გეტყვიან, რასაც გადავწყვეტთ“, – განაცხადა გიორგი გახარიამ.
მისი თქმით, ჰესის თემა გადაიდო და შეთანხმდა, რომ ჰესი აშენდება მაშინ, როცა მის მშენებლობას მოსახლეობის 90 პროცენტი დაუჭერს მხარს.
„ჩვენ შევთანხმდით, რომ ჰესის მშენებლობას მოსახლეობის 90 პროცენტი რომ დაუჭერს მხარს, მარტო მაშინ აშენდება. ჰესის გამო აქ არ ამოვსულვარ. მე ამოვედი, რომ ქვები ესროლეთ ფორმიან ადამიანებს. თითოეულ კადრს გავაანალიზებთ და ვნახავთ, ვინ ვის რა ესროლა“, – მიმართა აქციის მონაწილეებს გახარიამ შეხვედრის შემდეგ.