საქართველოს პარლამენტში სახელმწიფო უსაფრთხოების სამსახურის უფროსს, ვახტანგ გომელაურს მოუსმენენ.
გომელაური, დეპუტატების წინაშე ყოველწლიური ანგარიშით წარსდგება, ფორმატი კი ნახევრად დახურული იქნება. კერძოდ, სუს-ის ხელმძღვანელის ანგარიშის მოსმენის ეტაპი ღია იქნება, ხოლო კითხვა პასუხის დროს, სხდომა დაიხურება.
ფორმატი მიუღებელია საპარლამენტო ოპოზიციის ნაწილისთვის, რომელიც მოითხოვს, რომ ღია იყოს კითხვა -პასუხის ეტაპი. თავის მხრივ, უმრავლესობა განმარტავს, რომ სხდომის დახურვა იმ ინფორმაციების გასაჯაროების თავიდან აცილების მიზნით ხდება, რაც შესაძლოა, სახელმწიფო ინტერესების საზიანოდ იყოს გამოყენებული.
რაც შეეხება საკითხებს, დღევანდელ სხდომაზე ყურადღება გამახვილდება საზღვრების დემარკაციის, ოკუპირებულ ტერიტორიებსა და საოკუპაციო საზღვრებთან არსებულ მდგომარეობაზე, პანკისში ჩატარებულ სპეცოპერაციასა და თემირლან მაჩალიკაშვილის საკითხზე, ბერი გაბრიელ სალოსის ქუჩაზე ჩატარებულ სპეცოპერაციაზე. ასევე, რუსულ აგრესიაზე, ჰიბრიდულ ომსა და კიბერ უსაფრთხოებაზე.
ვახტანგ გომელაურს პარლამენტში 12:00 საათზე ელოდებიან.