ქვედა კიდურების დამბლა, საყრდენ-მამოძრავებელი სისტემის მკვეთრი მოშლა, პრობლემები ღვიძლსა და თავზე – პატიმარ ა. თ. – ს მეუღლე გვიყვება, რომ მისი ქმარი ციხეში სრულიად ჯანმრთელი შევიდა, იქიდან კი ინვალიდის ეტლით გამოვიდა, თუმცა ისიც დროებით. მალევე ავადმყოფი მსჯავრდებული ისევ ციხეში დააბრუნეს.
ყველაფერი 2011 წელს, ერთ-ერთი მაღაზიიდან ფულის მოპარვით დაიწყო, რის გამოც ა. თ. – ს 6-წლიანი პატიმრობა მიუსაჯეს. დაკავებიდან ორ წელიწადში, ხელისუფლებაში „ქართული ოცნების“ მოსვლის შემდეგ, პატიმარი ციხიდან გამოუშვეს, თუმცა ბრალი არ მოუხსნიათ. მას ჯანმრთელობის პრობლემების გამო სასჯელი დროებით გადაუვადეს.
მისი მეუღლე – ნ. ა. გვიყვება, რომ ქმარი დაკავებამდე ჯანმრთელი იყო, მაგრამ ციხეში შესვლიდან ორ წელიწადში ყველაფერი დაემართა.
რა პირობით გამოუშვეს ციხიდან
ნ. ა. : „წელიწადი და 8 თვე იჯდა, სრულიად ჯანმრთელი შევიდა და დაინვალიდებული გამოვიდა ეტლით. სულ 6 წელი მიუსაჯეს, 3 – ამნისტიით ჩამოაკლდა. არსად, არავისთვის მიგვიმართავს. არც ზარალის ანაზღაურებაზე, თუნდაც რაც ციხეში დამართეს. არც ფული გვქონდა, რომ ადვოკატი აგვეყვანა. რაც ციხიდან გამოვიდა, იმის მერეც სულ საავადმყოფოში დავრბოდით, სულ საავადმყოფოს კარზე ვართ, ხან მამა, ხან შვილი“.
ნ. ა. ამბობს, რომ მისი ქმარი 2013 წელს ციხიდან ერთი პირობით გამოუშვეს – ყოველ წელს მას სამხარაულის ექსპერტიზის დასკვნა უნდა მიეტანა, რომ ბრალდებული ა. თ. -ს ჯანმრთელობის მდგომარეობა ისევ მძიმე იყო. წინააღმდეგ შემთხვევაში მას ისევ ციხეში დააბრუნებდნენ.
„ყოველ წელს უნდა მიგვეტანა ექსპერტიზის დასკვნა. სამედიცინო გამოკვლევები დაახლოებით 3000 ლარი ჯდებოდა. ორჯერ მოვახერხეთ როგორღაც და ეს დასკვნა მივიტანეთ. ჩვენ სოციალურად დაუცველები ვართ, სასამართლოში ვითხოვეთ, რომ გადაევადებინათ რამდენიმე წლით, მაგრამ გვითხრეს, კანონი არ გვაძლევს ამის საშუალებასო. სანამ ხელახლა დაიჭერდნენ, ტომოგრაფია გადავუღეთ, კიდევ სხვა რაღაცეებიც უნდა გაგვეკეთებინა და ვეღარ მოვასწარით, ისევ დაიჭირეს“, – ამბობს ნ. ა.
სანამ იცოცხლებ ექსპერტიზა უნდა ატარო
რადიო „ფორტუნა“ პატიმრის ადვოკატსაც დაუკავშირდა, რომელიც ამბობს, რომ მსჯავრდებულს ნამდვილად ევალებოდა წელიწადში ერთხელ ექსპერტიზა ჩაეტარებინა, რადგან სასჯელი კი არ გაუუქმეს, არამედ გადაუვადეს.
დიმიტრი ნოზაძე, ადვოკატი: „ეს არ იყო სწორი, უნდა მომხდარიყო მისი სასჯელისგან განთავისუფლება ჯანმრთელობის მდგომარეობის გამო. ამ ეტაზე სასჯელაღსრულება შევიდა ამ წინადადებით, რომ გადავადება მომხდარიყო. აქ საკანონმდებლო ხარვეზიცაა. სასჯელის გადავადება ჯანმრთელობის მდგომარეობის გამო განუსაზღვრელი დროით ხდება. სანამ იცოცხლებ ექსპერტიზა უნდა ატარო. დათქმა არ არსებობს. თუ არ ჩაატარებ, შეგაბრუნებენ ციხეში“. განაგრძეთ კითხვა: