„მუნიციპალიტეტის მასშტაბით შენდება 7 ბაღი და სრულად რეაბილიტირდება 5 სკოლა, ახალ სკოლას კი ვაშენებთ სოფელ დარჩელში“, – ამის შესახებ განცხადება ზუგდიდის მერობის „ქართული ოცნება – დემოკრატიული საქართველოს“ კანდიდატმა, გიორგი შენგელიამ მოსწავლე-ახალგაზრდობის სასახლეში ზუგდიდის ბაღების აღმზრდელებსა და სკოლის პედაგოგებთან შეხვედრისას გააკეთა.
მერობის კანდიდატის განმარტებით, ახალი ბაღების მშენებლობასთან ერთად რეაბილიტირდება 10-ზე მეტი საბავშვო ბაღი. რაც შეეხება ზუგდიდში არსებულ სკოლებს – წელს სრული რეაბილიტაცია უტარდება 5 სკოლას, ერთი კი შენდება. გარდა ამისა, სახელმწიფო ბიუჯეტიდან 1 500 000 ლარია გამოყოფილი და მოხდება სხვადასხვა სკოლის ნაწილობრივი რეაბილიტაციაც.
„წინასაარჩევნო კამპანიის ფარგლებში, შევხვდით სკოლამდელი დაწესებულების აღმზრდელებსა და სკოლის პედაგოგებს. მათთან ერთად ის პრიორიტეტები და გეგმები განვიხილეთ, რომელთა განხორციელებაც მერად ჩემი არჩევის შემდეგ ჩემი და ჩემი გუნდის მთავარი ამოცანა იქნება. მე ვაცნობე მათ იმის შესახებ, რომ სკოლამდელი დაწესებულების აღმზრდელების ხელფასები 20%-მდე გაიზრდება, რაც, ამ ეტაპისთვის, ძალიან მნიშვნელოვანია. ეს პროცესები შემდგომშიც გაგრძელდება და შეუქცევადი იქნება მანამ, სანამ თითოეული პედაგოგის მოთხოვნილებები და ის შრომა საბოლოოდ არ იქნება დაფასებული. ასევე, მნიშვნელოვანია ის პროექტები, რომლებიც ხორციელდება ამ სფეროში ინფრასტრუქტურული კუთხით, ვგულისხმობ ბაღებისა და სასკოლო ინფრასტრუქტურის მშენებლობა-რეაბილიტაციას“, – განაცხადა გიორგი შენგელიამ.
შეხვედრას ვიცეპრემიერი მაია ცქიტიშვილი და სამეგრელო-ზემო სვანეთის სახელმწიფო რწმუნებული – ალექსანდრე მოწერელია ესწრებოდნენ, რომლებმაც საზოგადოებას გიორგი შენგელიას მხარდაჭერისკენ მოუწოდეს.