დავით გარეჯის საკითხთან დაკავშირებით, დღეს, საქართველოს საპატრიარქოში მორიგი შეხვედრები გაიმართა. ამის შესახებ ინფორმაციას საქართველოს საპატრიარქოს ვებ-გვერდი აქვეყნებს.
როგორც ინფორმაციაშია აღნიშნული, სრულიად საქართველოს კათოლიკოს-პატრიარქმა ილია მეორემ მღვდელმთავრებთან და სამღვდელოებასთან ერთად სრულიად საქართველოს შეიხი, რამინ იგიდოვი, აღმოსავლეთ საქართველოს მუფტი, იასინ ალიევი და ოქტაი ისაევი მიიღო.
„სტუმართა მხრიდან აღინიშნა, რომ საუკუნეების მანძილზე ჩვენს მშვიდობიან თანაცხოვრებაში უდიდესი წვლილი საქართველოს მართლმადიდებელ ეკლესიას მიუძღვის.
სრულიად საქართველოს კათოლიკოს-პატრიარქმა სტუმრების მიმართ პატივისცემა კიდევ ერთხელ დაადასტურა და იმედი გამოთქვა, რომ შექმნილი მდგომარეობა მშვიდობიანი გზით სამართლიანად გადაწყდება“, – აღნიშნულია ინფორმაციაში.