ხმაური და სიტყვიერი დაპირისპირება იყო ზუგდიდის საკრებულოს სხდომაზე, რომელსაც გაერთიანებული ოპოზიციის კანდიდატი სანდრა რულოვსი და პარტიის სხვა წარმომადგენლები ესწრებოდნენ. სხდომაზე კამათი რულოვსის მიერ ერთ-ერთი დეპუტატისადმი მიმართვას მოჰყვა.
“გამეცით პასუხი, რას ნიშნავს თქვენი სიტყვები, რომ არჩევნებში მოგების გამო ყველაფერზე წავლენ”, – ჰკითხა რულოვსმა უმრავლესობის დეპუტატ გია დანელიას.
ირაკლი ლაგვილავამ, რომელიც “ქართულ ოცნებას” წარმოადგენს, რულოვსს უთხრა, რომ მას ზვიად გამსახურდიას დარბაზში საუბრის მორალური უფლება არ ჰქონდა.
სანდრა რულოვსმა განაცხადა, რომ იგი ადრე ზვიად გამსახურდიას მომხრე არ იყო და ახლა უკვე პოზიცია შეიცვალა.
„ზვიადის მომხრე მეც გავხდი. შეიძლება ადრე არ მქონდა ასეთი წარმოდგენა და მეგონა, რომ რაღაც დაჯგუფებები იყო, რადგან 90-იან წლებში ასეთი მოსაზრება იყო ხალხში. ამაზე ვწერდი ხოლმე პარაგრაფებს, თუმცა ახლა ყველა უნდა ვიყოთ ზვიადის იდეის გამაგრძელებლები, აქ არ არის საუბარი, ვინ მოგვწონს და ვინ არა, ქვეყანაა გადასარჩენი“, – განაცხადა სანდრა რულოსვმა.
გაერთიანებული ოპოზიციის მერობის კანდიდატმა დარბაზი მალევე დატოვა, თუმცა სიტყვიერი დაპირისპირება დერეფანშიც გაგრძელდა.