ჩვენ საქმე არ გვაქვს „გირჩის“ ლიდერებთან, ჩვენ საქმე გვაქვს ზოგადად, ამომრჩევლებთან, – განაცხადა „თავისუფალი დემოკრატების“ წევრმა, ალექსანდრე ბარამიძემ საქართველოს პირველი არხის გადაცემაში „მოამბე-დღის თემა“.
„უკვე ორი დღეა, „გირჩის“ ლიდერებისგან ცოტა არ იყოს, ბრაზიან პრეტენზიებს ვისმენთ იმასთან დაკავშირებით, კი მაგრამ, რატომ არ მოხვედით, ჩვენ ეთერში რატომ არ მიიღეთ მონაწილეობაო; კი მაგრამ, რატომ არ გვთხოვთ, ხმები მოგცეთო და ა.შ. ჩვენ საქმე არ გვაქვს „გირჩის“ ლიდერებთან. ჩვენ საქმე გვაქვს ზოგადად, ამომრჩევლებთან. ჩვენ ამომრჩევლებს ველაპარაკებით და ისევე, როგორც ნებისმიერი სხვა პოლიტიკური ძალა, საჯარო სივრცეში, ცივილიზებული საარჩევნო კამპანიის წარმოების მეშვეობით ვცდილობთ, რაც შეიძლება, მეტი ამომრჩეველი მივიმხროთ და ისინი ჩვენი პოლიტიკური პლატფორმის, ხედვების, მიზნებისა და სტრატეგიების სისწორეში დავარწმუნოთ“, – განაცხადა ბარამიძემ.
ამ განცხადებით ალექსანდრე ბარამიძემ გადაცემის წამყვანის შეკითხვას უპასუხა, როგორ აპირებს საარჩევნო ბლოკი „ევროპული საქართველო-თავისუფალი დემოკრატები“ „გირჩის“ გადარწმუნებას, რომ მისმა ამომრჩევლებმა არჩევნების მეორე ტურში მხარი შალვა შავგულიძეს დაუჭირონ.
როგორც ბარამიძემ აღნიშნა, „თავისუფალი დემოკრატები“ ისეთ საარჩევნო კამპანიას აწარმოებენ, როგორსაც საჭიროდ თვლიან, „გირჩი“ კი ისეთ კამპანიას აწარმოებს, როგორსაც თავად თვლის საჭიროდ და აქედან გამომდინარე, „გირჩის“ ლიდერთა“ გაღიზიანების მიზეზს ვერ ხედავს.