საქართველოს ყოფილი პრეზიდენტი და ოდესის ყოფილი გუბერნატორი მიხეილ სააკაშვილი უკრაინაში ჩასვლას დღეს გეგმას.
როგორც მან „კურიერთან“ საუბრისას განაცხადა, მოქალაქეობა მას უკანონოდ ჰქონდა ჩამორთმეული
„მე დავეხმარები უკრაინის ახალ პრეზიდენტს, ძალიან საინტერესო პიროვნებას, რომელსაც ვიცნობ დიდი ხანია, დავეხმარები ზელენსკის და დავეხმარები უკრაინელ ხალხს. უკრაინაში ჩემ წინააღმდეგ იყო ზუსტად ისეთივე პოლიტიკური დევნა, როგორც საქართველოში“, – განაცხადა სააკაშვილმა.
მიხეილ სააკაშვილს უკრაინის პრეზიდენტმა ვლადიმირ ზელენსკიმ მოქალაქეობა გუშინ დაუბრუნდა.
ცნობისთვის, მიხეილ სააკაშვილმა უკრაინის მოქალაქეობა 2015 წელს მიიღო, როდესაც ოდესის გუბერნატორად დაინიშნა.
2017 წელს უკრაინის პრეზიდენტმა პეტრო პოროშენკომ სააკაშვილი ამ თანამდებობიდან გადააყენა და უკრაინის მოქალაქეობაც ჩამოართვა, ვიდრე ის პოლონეთში იმყოფებოდა.
სააკაშვილმა მომხრეების მხარდაჭერით, უკრაინა-პოლონეთის საზღვარი გაარღვია. შემდეგ უკრაინაში გამართა საპროტესტო აქციები. 2018 წელს კი უკრაინიდან მიხეილ სააკაშვილის დეპორტაცია განხორციელდა.
ზელენსკის ამ გადაწყვეტილებამდე, სააკაშვილს არცერთი ქვეყნის მოქალაქეობა არ ჰქონდა. 2018 წლის თებერვალში მეუღლის სანდრა რულოვსის სამშობლომ, ნიდერლანდებმა ევროკავშირში ცხოვრებისა და მუშაობის უფლება მისცეს.
შეგახსენებთ, ასევე, რომ მიხეილ სააკაშვილს რამდენიმე სისხლის სამართლის საქმეზე საქართველოს პროკურატურა ედავება და მის ექსტრადიციას ითხოვს. აქედან ერთ-ერთ საქმეზე, კერძოდ, სანდრო გირგვლიანის მკვლელობაში ბრალდებულთა შეწყალების საქმეზე 5 იანვარს ქართულმა სასამართლომ სააკაშვილს დაუსწრებლად 4 წლით თავისუფლების აღკვეთა მიუსაჯა. ამნისტიით მას სასჯელი 1/4-ით შეუმცირა და 3 წლით პატიმრობა დარჩა.