“იმ 9-წლიანი რეჟიმის შემდეგ დანევროზებული ჩვენი მოქალაქეები, რომლებიც თავს ვერ იკავებენ, პატარა კამათის გულისთვის ოჯახები რომ ინგრევა, რანაირად იცავს ოჯახებს სახელმწიფო დანგრევისგან?“, – ამ კითხვით მიმართა დეპუტატმა ემზარ კვიციანმა ადამიანის უფლებათა დაცვის კომიტეტის თავმჯდომარეს სოფო კილაძეს პლენარულ სხდომაზე, სადაც განიხილავენ კანონპროექტს, რომლის მიზანი ოჯახში ძალადობრივი ქცევის ადრეულ ეტაპზე გამოვლენა და პრევენციაა.
ემზარ კვიციანის მეორე კითხვა თაღლითურად ოჯახის შექმნის საკითხს ეხებოდა:
“თაღლითობაზე რას იტყვით, გინდა ქალების, გინდა კაცების მხრიდან? ქალი რომ თაღლითურად შექმნის ოჯახს და მერე ქონების გამო გაეყოფა და ამას ძალადობას დააბრალებს, ეს არის გათვალისწინებული? არ ვარ წინააღმდეგი რომ კანონი დაიხვეწოს, მაგრამ ფაქიზად მოვეკიდოთ, რადგან ეს არის ოჯახი. შეიძლება ევროპელებისგან და ამერიკელებისგან რაღაც ტექნოლოგიები ვისწავლოთ, მაგრამ ოჯახურ ტრადიციას იქით ვასწავლით ძალიან ბევრს“, – განაცხადა ემზარ კვიციანმა.
კანონპროექტის მომხსენებელი სოფო კილაძე ემზარ კვიციანს დაეთანხმა, რომ სახელმწიფო ოჯახში ზედმეტად არ უნდა ჩაერიოს და ბალანსი დაიცვას, თუმცა მისი თქმით, კონკრეტულ შემთხვევებს, რაზეც ემზარ კვიციანს ჰქონდა კითხვები, ამას სახელმწიფო ვერ გააკონტროლებს.
„გეთანხმებით, რომ ჩვენ ზედმეტად არ უნდა ჩავერიოთ ოჯახში. ვიღაცა ვიღაცას იმის გამო გაყვა, რომ მისი ქონება აინტერესებდა, ეს სახელმწიფომ როგორ უნდა გააკონტროლოს? ან ძალადობასთან რა შუაშია? რაღაცის გულისთვის ცემა, არაფრის გამო არ არის დაშვებული. ოჯახში ზედმეტად არ უნდა ჩავერიოთ, აქ უნდა დავიცვათ ბალანსი, მაგრამ ჩვენთვის მთავარია ადამიანები ძალადობისგან დავიცვათ“, – განაცხადა სოფო კილაძემ ემზარ კვიციანის კითხვის საპასუხოდ.