სერიალი “ჩემი ცოლის დაქალები” ტელეკომპანია “რუსთავი 2” – ის ეთერში აღარ გავა. ამის შესახებ On.ge-ს ფორმულა კრეატივში განუცხადეს. მათი თქმით, “რუსთავი 2” – ზე სერიალი სეზონის ბოლომდე იქნება.
“ჩემი ცოლის დაქალები” ფორმულა კრეატივის შექმნილი სატირულ-იუმორისტული ჟანრის ქართული სერიალია, რომელიც ტელეკომპანია “რუსთავი 2” – ზე 2011 წლიდან გადის.
მათივე ცნობით, “რუსთავი 2” -ზე, ასევე, აღარ გავა გადაცემები: “ჩემი სამზარეულოს წესები” და “მთავარი ექიმი”.
ფორმულა კრეატივმა ახალი ტელევიზიის შექმნის შესახებ განაცხადა, სადაც მათივე წარმოებული ყველა პროექტი გავა.
ფორმულა კრეატივი თანამოაზრეებთან და პარტნიორებთან ერთად ტელევიზიას ქმნის. ამის შესახებ ინფორმაცია თავად კომპანიის წარმომადგენლებმა დაუდასტურეს On.ge-ს.
“გვაქვს სურვილი და ვალდებულება შევქმნათ ხარისხიანი, უკომპრომისო, სანდო, ოპერატიული და ეფექტური მედია-საშუალება, სადაც ასპარეზი და პოზიციის გამოხატვის საშუალება ექნება ყველა იმ ადამიანს, ორგანიზაციას, პარტიას და ჯგუფს, ვისთვისაც სულერთი არ არის ჩვენი ქვეყნის განვითარებული და ცივილიზირებული მომავალი”, – აცხადებენ კომპანიაში.