პეკინის ქუჩაზე დაჭრილ ტაქსის მძღოლს ამ წუთებში ქირურგიის ეროვნულ ცენტრში ოპერაცია უტარდება.
დაჭრილი მამაკაცი 53 წლისაა, იგი სამედიცინო დაწესებულებაში სასწრაფო დახმარების ბრიგადამ გადაიყვანა. პაციენტს დაზიანება ხელის მტევანზე აღენიშნება. ამ წუთებში ტრავმატოლოგები დაჭრილს მცირე ოპერაციას უტარებენ. პაციენტს სიცოცხლესთან შეუთავსებელი ჭრილობები არ აქვს. ტაქსის მძღოლი პეკინზე ცოტა ხნის წინ დაჭრეს. თვითმხილველების განცხადებით, თავდასხმას მგზავრებთან ურთიერთშელაპარაკება უძღოდა. არსებული ინფორმაციით, ტაქსის მძღოლი ცეცხლსასროლი იარაღით არის დაჭრილი.
როგორც ადგილზე ყვებიან, ტაქსის მძღოლს მგზავრობის თანხა არ გადაუხადეს, რასაც მასსა და მგზავრებს შორის შელაპარაკება მოჰყვა.
შინაგან საქმეთა სამინისტროს ინფორმაციით, მომხდართან დაკავშირებით სამართალდამცველების მიერ “შეჩერებული და დადგენილია ორი პირი”. “ამ წუთებში მიმდინარეობს საგამოძიებო მოქმედებები”, – აცხადებენ უწყებაში.
კომენტარები