საუდის არაბეთის აღმოსავლეთში, ქალაქ დაჰრანში ნავთობკომპანია „საუდი არამკოს“ ადმინისტრაციულ შენობას თავს დაესხნენ. ქვეყნის ენერგეტიკის სამინისტროს განცხადებით, თავდასხმის შედეგად შენობაში ხანძარი გაჩნდა. უწყების ცნობით, ინციდენტის შედეგად არავინ დაშავებულა.
მანამდე სააგენტო „როიტერს“ კომპანიის წყარომ განუცხადა, რომ დაჰრანში „საუდი არამკოს“ სათავო ოფისის კომპლექსს ბალისტიკური რაკეტა მოხვდა. წყაროს ცნობით, დაზიანდა საოფისე ცათამბჯენი, კერძოდ, მისი ზედა სამი სართული.
კომპლექსში „საუდი არამკოს“ ერთ-ერთი ძირითადი სამუშაო ცენტრია განთავსებული, რომელიც კომპანიის სახმელეთო და საზღვაო ნავთობის ჭაბურღილების, მილსადენების, ნავთობგადამამუშავებელი ქარხნებისა და საექსპორტო ტერმინალების ფართო ქსელს მართავს.
ირანის მოკავშირე იემენელი „ჰუსიტები“, უკვე ერთი კვირაა, საუდის არაბეთის მნიშვნელოვან ობიექტებს ბალისტიკური რაკეტებითა და დრონებით უტევენ. საუდის არაბეთის დედაქალაქის საერთაშორისო აეროპორტზე ოთხი თავდასხმა განხორციელდა. მეფე ხალიდის საერთაშორისო აეროპორტზე „ჰუსიტების“ თავდასხმას ერთი ადამიანი ემსხვერპლა, 11 კი დაშავდა. თავდასხმას წინ უძღოდა ერ რიადის საერთაშორისო აეროპორტზე დარტყმა, რომელზეც პასუხისმგებლობაც ირანის მიერ მხარდაჭერილმა „ჰუსიტებმა“ აიღეს. თავდასხმის შედეგად 13 ადამიანი დაიღუპა და 300-ზე მეტი დაიჭრა.
ბოლო ათწლეულის განმავლობაში ეს საუდის არაბეთში ბალისტიკური რაკეტით განხორციელებული ყველაზე მასშტაბური თავდასხმა იყო. მომხდარის შემდეგ ქვეყნის მასშტაბით ფრენები შეფერხდა.