„ნაცმოძრაობაში“ „კანონი და სამართლის“ ლიდერის, თაკო ჩარკვიანის განცხადებას „ევროპული საქართველოს“ ინიციატივაზე არ იზიარებენ.
„ნაციონალური მოძრაობა“ თავადაც მოუწოდებს ოპოზიციურ პარტიებს, ,,ევროპული საქართველოს” შეთავაზება მიიღონ და დააფიქსირონ საკუთარი პოზიცია, რომ ისინი ,,ქართულ ოცნებას” 2020 წელს კოალიციას არ შეუქმნიან“, – აცხადებს „ნაცმოძრაობის“ თავმჯდომარე რომან გოცირიძე.
მისი თქმით, ის, რომ ყველა პარტიამ გამოხატოს საკუთარი აზრი, რომ მომავალ არჩევნებში არ შეუქმნის უმრავლესობას „ქართულ ოცნებას“, არის ძალიან სერიოზული განცხადება.
„დიდი ხანია, ამის შესახებ საუბრობს „ნაციონალური მოძრაობა“, ასევე ზოგიერთი სხვა პარტიაც და მისასალმებელია, რომ ,,ევროპული საქართველო“ იზიარებს ამ იდეას. სპეციალური განცხადებაც გააკეთეს ამის თაობაზე. ის ემსახურება ივანიშვილის ერთმმართველობის დემონტაჟს და ემსახურება მრავალპარტიული კოალიციის შექმნას, რომელიც საქართველოს გაიყვანს ევროპული და დემოკრატიული განვითარების გზაზე. წინასწარ ასეთი შეთანხმება არის აუცილებელი, რათა ერთხელ და სამუდამოდ დამთავრდეს „ოცნების“ წარუმატებელი მმართველობა“, – განაცხადა გოცირიძემ.
გოცირიძის განცხადებით, გაერთიანებაში „ძალა ერთობაშია“ ათზე მეტი პარტიაა გაწევრიანებული, რომელთაც აქვთ საკუთარი ხედვა:
„ჩვენ ყველა განსხვავებული შეხედულების კომენტარს ვერ გავაკეთებთ. ჩვენი პოზიცია არის დადებითი, რომელსაც ჰქვია შეთანხმება სამომავლოდ დიდი დემოკრატიული კოალიციის შექმნის შესახებ და განცხადება იმაზე, რომ არ იქნებიან კოალიციაში „ქართულ ოცნებასთან”. ან „ქართული ოცნება“ და პირდაპირ რუსული ძალა ,,პატრიოტთა ალიანსი” იქნებიან ერთად ან გაერთიანებული დიდი ოპოზიცია, რომელიც შექმნის მთავრობას და საქართველოში დაამთავრებს ამ უზურპატორული ოლიგარქიული მმართველობის რეჟიმს“, – განაცხადა რომან გოცირიძემ.
პოლიტიკური პარტია „ევროპული საქართველოს“ ერთ-ერთი ლიდერი სერგი კაპანაძე თაკო ჩარკვიანის შეფასებას გამოეხმაურა მათ ინიციატივაზე, რომ ყველა პროდასავლურმა ოპოზიციურმა პარტიამ უარი თქვას 2020 წლის არჩევნების შემდეგ „ქართულ ოცნებასთან“ კოალიციაზე.
„ევროპული საქართველოს“ ინიციატივას თაღლითობის სუნი ასდის, – ამის შესახებ „კანონი და სამართლის“ ლიდერმა, თაკო ჩარკვიანმა 13 სექტემბერს განაცხადა.