„ენდიაის“ კვლევა სხვა კვლევებისგან იმით განსხვავდება, რომ ზედმეტად მაღალია გამოკითხულთა უარი პასუხებზე, – ამის შესახებ ფრაქცია „ევროპული საქართველოს“ წევრმა, ოთარ კახიძემ განაცხადა.
მისი თქმით, „ენდიაი“ არ არის ხოლმე პარტიული მხარდაჭერის საუკეთესო მსაზღვრელი. გამოკითხულების ნახევარი საკუთარ არჩევანს არ ამხელს.
„ზედმეტად მაღალია იმ გამოკითხულთა რაოდენობა, რომლებიც არ ასახელებენ საკუთარ არჩევანს განსხვავებით „აირაის“ კვლევისგან, სადაც სხვა რიცხვებია. როგორც მოგეხსენებათ, ოპოზიციური ამომრჩეველი უფრო მეტად ამჯობინებს თავისი არჩევანი არ გათქვას. მკვლევარების პასუხისმგებლობაა, ისე წარმართონ გამოკითხვის პროცესი, რომ ჩაეძიონ გამოკითხულებს და მიიღონ პასუხები. ამას აკეთებს „აირაი“ და არ აკეთებს „ენდიაი“. შესაბამისად, „ენდიაი“ არ არის ხოლმე საუკეთესო მსაზღვრელი პარტიული მხარდაჭერის. გამოკითხულების ნახევარი საკუთარ არჩევანს არ ამხელს. ოთხი პროცენტი გვეუბნება იმას, რომ კვლევის ჩატარების მეთოდოლოგია ცოტა განსხვავებულია. მანამდე იყო „აირაის“ კვლევა, სადაც პარტიას შვიდი პროცენტი გვაქვს, ზრდაა. „აირაის“ კვლევის შემთხვევაში ბევრად ნაკლებია უარი პასუხებზე, ვიდრე „ენდიაის“ შემთხვევაში. ვთვლით, რომ უარი პასუხზე და მაღალი მაჩვენებელი განაპირობებს ამ ცდომილებას.
„ნაციონალურ მოძრაობას“ უფრო მაღალი პროცენტი აქვს, ვიდრე ჩვენ, მაგრამ მათი მხარდაჭერა 9 პროცენტია? ამას სერიოზულად ამბობთ? როცა 50 პროცენტი არ ასახელებს საკუთარ არჩევანს, მათი დიდი ნაწილი ოპოზიციურად განწყობილია, – განაცხადა ოთარ კახიძემ.