ინდუსტრიულ რქაწითელის ფასი, რომელიც არის ყველაზე მაღალი ხარისხის, 70 თეთრია, – ამის შესახებ გარემოს დაცვისა და სოფლის მეურნეობის მინისტრმა, ლევან დავითაშვილმა ჟურნალისტებს განუცხადა.
მისი თქმით, რთველი ინტენსიურ ფაზაშია. გადამუშავებულია 80 000 ტონაზე მეტი ყურძენი, აქედან 50 000 ტონაზე მეტი – რქაწითელი, 20 000 ტონაზე მეტი – საფერავი და დანარჩენი სხვა ჯიში.
„ძირითადი ფასი ინდუსტრიულ რქაწითელზე, რომელიც არის ყველაზე მაღალი ხარისხის, არის 70 თეთრი. იყო სპეკულაციები, რომ მევენახეებს არ ექნებოდათ თავიანთი ყურძნის დაბინავების საშუალება, ისინი წავიდოდნენ ზარალზე. ეს ასე არ არის. მინიმალური ფასი არის 70 თეთრი. მიკროზონების მიხედვით, ფასი თეთრ ყურძენზე არის 80 თეთრიდან ლარამდე. ეს ეხება ძირითადად კახურ მწვანეს. უფრო მეტია ქისის შემთხვევაში. ფასი საფერავზე არის 1.50 ლარი და ზემოთ. სტანდარტული საფერავის ფასი – 1.50 ლარი. მუკუზანის მიკროზონაში – 1,50 ლარიდან 2 ლარამდე. ხოლო 2 ლარიდან 2,5 ლარამდე ქინძმარაულის მიკროზონაში“, – განაცხადა ლევან დავითაშვილმა.