„თქვენთვის, როგორც მოსამართლისთვის, რომელ არის პირველი წიგნი – კონსტიტუცია თუ ბიბლია“, – ამ კითხვით მიმართა საქართველოს დემოკრატიული ინციატივის ხელმძღვანელმა გიორგი მშვენიერაძემ უზენაესის მოსამართლეობის კანდიდატს მერაბ გაბინაშვილს.
გიორგი მშვენიერაძის ამ კითხვას მერაბ გაბინაშვილმა ასე უპასუხა:
„მე ასე რიგში არ ჩავაყენებ და მაქვს ამის უფლება. ჩემთვის, როგორც მოსამართლისთვის, როგორც საჯარო მოხელისთვის, კონსტიტუცია არის ძალიან მაღალი ღირებულება, კონსტიტუცია არის ის მთლიანი ხერხემალი, რასაც ჩვენი სახელმწიფო ეყრდნობა, თავისი სამართლებრივი განვითარების გზაზე. მე ვთვლი, რომ ეს მცნებები ერთმანეთს არ უნდა შევადაროთ.
დანარჩენი, მათ შორის ბიბლია, მე ვარ ქრისტიანი ადამიანი, არის ჩემი მორალი, ჩემ მორალთან თანხვედრაში, მის ღირებულებებთან ვარ სრულ თანხვედრაში და ვცდილობ, ვიცხოვრო ისე, საზოგადოებაში ვიყო ისეთი ადამიანი, როგორი ადამიანიც საღვთო მოძღვრებით შეიძლება იყოს იდეალური ადამიანი სხვა ადამიანისათვის – კაცთმოყვარე, შემწყნარებელი და ბოროტების არ ჩამდენი, ეს მინიმუმ.
ჩემი ბიბლია ჩემი მორალია, ჩემი ღმერთი ჩემში, როგორც მორალი , ყოველთვის არსებობს და ის თუ დამტოვებს, პრაქტიკულად მე პიროვნება დამტოვებს, იმიტომ რომ მე მთლიანად ჩემს მორალზე და სინდისზე ვარ თავიდან ბოლომდე .. მას შემდეგ რაც აზროვნების უნარი გამაჩნია, მე ამ პრინციპებით ვცხოვრობ , არ შეიძლება ადამიანმა მორალის გარეშე იცხოვროს . შინაგანი ხმა ყოველთვის უნდა აკონტროლებდეს ადამიანის ქცევას და ადამიანურობის ხარისხს“.