“ის, რაც დღეს და გუშინ ტყიბულში ხდებოდა, არის აბსოლუტურად მიუღებელი, – ამის შესახებ საქართველოს პრემიერ- მინისტრმა, მთავრობის სხდომაზე განაცხადა. გიორგი გახარიას თქმით, მიუხედავად იმისა, რომ ტყიბულში პრობლემები წლების განმავლობაში გროვდებოდა, ინვესტორებმა ნაკისრი ვალდებულებები უნდა შეასრულონ.
„რა თქმა უნდა, დღეს საუბარს დავიწყებთ ტყიბულში განვითარებული მოვლენებით. ის, რაც დღეს და გუშინ ტყიბულში ხდებოდა, არის აბსოლუტურად მიუღებელი. თუმცა, აქვე უნდა აღვნიშნოთ, რომ ეს ის პრობლემებია, რომელიც დაგროვილია წლების განმავლობაში. ყველა ინვესტორმა და დამსაქმებელმა უნდა გაითვალისწინოს, რომ ის ვალდებულია სრულფასოვნად შეასრულოს როგორც თავისი საფინანსო-სახელფასო ვალდებულებები, ასევე შეუქმნას თითოეულ დასაქმებულს შესაბამისი შრომითი პირობები, რაც რა თქმა უნდა გულისხმობს შრომითი და ტექნიკური უსაფრთხოების ნორმების სრულ დაცვას. კიდევ ერთხელ მინდა ხაზგასმით აღვნიშნო, რომ მიუღებელია რაც დღეს ტყიბულში ხდება. მიუხედავად იმისა, რომ ეს პრობლემები წლების განმავლობაში გროვდებდებოდა, მსგავს შემთხვევებს ჩვენს ქვეყანაში ადგილი არ უნდა ჰქონდეს“, – განაცხადა გიორგი გახარიამ.