იურიდიულ საკითხთა კომიტეტის თავმჯდომარე ანრი ოხანაშვილი აცხადებს, რომ დამოუკიდებელი დეპუტატის ეკა ბესელიას დღევანდელ ქმედებას სამართლებრივი რეაგირება უნდა მოჰყვეს.
ანრი ოხანაშვილი აპირებს, ამ საკითხს სამართლებრივი მსვლელობა მისცეს. დეპუტატი აქვე დასძენს, რომ ეკა ბესელიას ადგილას ის პარლამენტის წევრის მანდატს დატოვებდა.
„კატეგორიულად მიუღებელია, რაც არ უნდა ემოციები გქონდეს ადამიანის მიმართ, ფიზიკურად შეეხო მას, პარლამენტის წევრი, რომელიც ხარ ხალხის წარმომადგენელი, შეეხო შენს კოლეგას. ეს წარმოუდგენელი ფაქტია. ამასთან დაკავშირებით მექნება კონსულტაცია შესაბამისი ორგანოებთან, რომლებიც პარლამენტში არსებობენ, რომ დაინტერესდნენ ამ ფაქტით. ამას უნდა მიეცეს სამართლებრივი რეაგირება. მე, რა თქმა უნდა, ამ საკითხს მივცემ სამართლებრივ მსვლელობას, იმისთვის, რომ ასეთი ფაქტები სამომავლოდ არ განმეორდეს. როცა ასე უპასუხისმგებლოდ იქცევი და ფიზიკურად ეხები საკუთარ კოლეგას, ეს მეტყველებს ბევრ რამეზე, კონკრეტულ ადამიანთან მიმართებაში. ასეთი რამ რომ შემთხვევოდა, მე ალბათ პარლამენტის წევრის მანდატს დავტოვებდი. ეს ჩემთვის მორალურად მიუღებელი იქნებოდა“, – განაცხადა ანრი ოხანაშვილმა.
ცნობისთვის, დღეს იურიდიულ საკითხთა კომიტეტზე “ქართული ოცნების“ ყოფილი და მოქმედი დეპუტატები ვანო ზარდიაშვილი და ეკა ბესელია ერთმანეთს დაუპირისპირდნენ. ეკა ბესელიამ ზარდიაშვილს დაარტყა.