საპარლამენტო უმრავლესობის ლიდერი გია ვოლსკი „ლელოს“ წევრის, კახა კოჟორიძისმიერ მის მიმართ გაკეთებულ განცხადებას არასერიოზულს უწოდებს.
ჟურნალისტებთან საუბარში გია ვოლსკი მამუკა ხაზარაძისა და კახა კოჟორიძის განცხადებას გამოეხმაურა.
„მაია ცქიტიშვილს ცოტა კი დასცინა, მაგრამ მაია ცქიტიშვილი ხაჭაპურსაც უკეთესს გამოაცხობს და თუ საჭიროა, პორტსაც უკეთესად ააშენებს. საზოგადოება მიეჩვია იმას, რომ წამოძახილები ხან კორუფციაზეა, მით უმეტეს, წინასაარჩევნო პერიოდი ადრე დაიწყო და ასეთი შეძახილები იქნება, მაგრამ ფაქტებია მთავარი. ფაქტები უნდა დაიდოს 17 მილიონზეც და იმაზეც, თუ სადმე კორუფციის ნიშანი არსებობს. ეს შეიძლება გამაღიზიანებელი იყოს, მაგრამ ნორმალურია. წამოძახება, რომ შერჩეს და მედიამ კითხვები დასვას, ესეც პოლიტიკური ფანდია. წინასაარჩევნო პერიოდია და ასეთ პოლიტიკურ ფანდებს ბევრს გავიგებთ. სხვათა შორის, ხაჭაპურების ცხობა არ მეხერხება, მაგრამ კოჟორიძემ კვერცხები მოხარშოს. ეს განცხადებები არასერიოზული მგონია. ქალების მიმართ არასასიამოვნო დამოკიდებულებაა. მთავარია, რაც ცქიტიშვილმა თქვა, რომ თავის სისტემაში ყველაფერზე პასუხისმგებელია და ინფრასტრუქტურა ჩვენს თვალწინ ვითარდება. მაია ხაჭაპურსაც კარგად აცხობს და თავის საქმესაც შესანიშნავად უძღვება“, – დასძინა ვოლსკიმ.