პატრიარქის ქორეპისკოპოსობიდან დღეს გადამდგარი მეუფე იაკობი მორიგ სკანდალურ ცნობებს ავრცელებს. მისი განცხადებით, საქართველოს რეგიონული განვითარებისა და ინფრასტრუქტურის ყოფილ მინისტრს ხელშეუხებლობისთვის 15 მლნ დოლარს ყოფილი მთავარი პროკურორი, ოთარ ფარცხალაძე და ბიზნესმენი, უჩა მამაცაშვილი სთხოვდნენ.
ინფორმაციას ამის შესახებ „მთავარი არხი“ ავრცელებს. უცნობია, გადაიხადა თუ არა 15 მლნ რამაზ ნიკოლაიშვილმა.
სასულიერო პირის ინფორმაციით, „გეგმის“ განხორციელებაში აღნიშნულმა პირებმა დახმარება კრიმინალურ ავტორიტეტებს სთხოვეს.
მეუფე იაკობი ინტერვიუში ამბობს, რომ ფარცხალაძეს თავის მოჭრით დაემუქრა.
„კაბინეტში, შეხვედრაზე მოითხოვეს 15 მლნ. თუ გადაიხდიდა, მერე ისევ მოთხოვდნენ“, – თქვა პატრიარქის ყოფილმა ქორეპისკოპოსმა.
ტელეკომპანიის ცნობით, მეუფე ქორეპისკოპოსობიდან გადადგომამდე ერთი დღით ადრე ჩაწერეს.
ყოფილ მინისტრს და პარლამენტის წევრს, რამაზ ნიკოლაიშვილს ამ თემაზე საუბარი არ სურს.
„რაზე მესაუბრებით, არ ვიცი. უნდა გავესაუბრო მეუფეს, გავარკვევ, რაზე საუბრობს“, – უთხრა მან „მთავარ არხს“.