ბოდბელმა ეპისკოპოსმა იაკობმა წმინდა ნინოს ეკლესიაში საშობაო წირვაზე ქადაგებისას დეკანოზ გიორგი მამალაძის შეწყალების საკითხზეც ისაუბრა. წირვის დასრულების შემდეგ მან ჟურნალისტებთან განაცხადა, რომ დეკანოზი რომ მართალი ყოფილიყო, მას გვერდით დაუდგებოდნენ როგორც პატრიარქი, ისე თავად:
„იმ ადამიანს ჭკუა აქვს, რომელიც ახლა პატრიარქს ბრძოლას გამოუცხადებს?.. ნამდვილად მოსაკითხია, ყველა მოსაკითხია აბსოლუტურად. აბა, რა იციან, რა უნდათ, რას იძახიან და ერთი არის რომ იძახი და მეორეა, რას ამტკიცებ და რას არა. პასუხი უნდა მიიღონ, რაც ეკუთვნით, ისე. რჯულის კანონს იძახიან, მიიღებენ რჯულის კანონით. იმ სიმართლესაც ვნახავთ, ერთმანეთს რატომ იცავენ მასე? რა ცოდვამ დააკავშირა მასე მაგენი ერთმანეთთან, მაგასაც გაჩვენებთ…
თუ შეიწყალებს პრეზიდენტი, შეიწყალებს რა. ჩემთვის დეკანოზი კი არა, იცით საკვირველი რა არის? სოხუმი უნდა გაწუხებდეთ, აფხაზეთი უნდა გაწუხებდეთ და ცხინვალის რეგიონი. ასევე ნებისმიერი პატიმარი. მაგი რომ ოდნავ მართალი ყოფილიყო ხო, პატრიარქიც დაუდგებოდა, მეც დავუდგებოდი, იცოდეთ რაა“, – განაცხადა მეუფე იაკობმა.
დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს ე.წ. ციანიდის საქმეზე. სასამართლომ გიორგი მამალაძე დამნაშავედ ცნო კათოლიკოს-პატრიარქის მდივან-რეფერენტის, შორენა თეთრუაშვილის მკვლელობის მომზადებასა და იარაღის უკანონოდ შეძენა-შენახვაში და 9 წლით პატიმრობა მიუსაჯა. დეკანოზი დანაშაულის ჩადენას უარყოფს.