ვარკეთილში, ე.წ “დამპალოს სასაფლაოზე სადისტურად მოკლული 24 წლის ბიჭის, მურად წურწუმიას საქმეზე დაკავებულ მეორე პირს, ვახტანგ ბურძენიძეს ბრალი წარედგინა.
ბრალის წარდგენა პოლიციის მთავარ სამმართველოში რამდენიმე წუთის წინ დასრულდა. ბურძენაძის ადვოკატის განცხადებით, მისი დაცვის ქვეშ მყოფი პირი ბრალს არ აღიარებს.
„ჩემი დაცვის ქვეშ მყოფიც განცდის ამ სიტუაციას. წარდგენილ ბრალდებაში ის არ ცნობს თავს დამნაშავედ, ვინაიდან მომხდარი ინციდენტის დროს ის არ იყო ჩართული ჩხუბში, ჰქონდა გამშველებლის ფუნქცია. რაც შეეხება საკითხს, თითქოს გზაში მიატოვეს მურად წურწუმია, არ შეესაბამება სინამდვილეს. ჩემი დაცვის ქვეშ მყოფის მიერ მოხდა ტრანსპორტირება მის საცხოვრებელ ბინაში. ანუ თავად ცდილობდა, გაეწია პირველადი სამედიცინო დახმარება, რაც ვერ უზრუნველყო. შეუძლოდ გახდა ამჟამად უკვე გარდაცვლილი ბიჭი, რის შემდეგაც ვახტანგ ბურძენიძემ გამოიძახა სასწრაფო სამედიცინო დახმარება. ამ ეტაპზე ბრალდების დადგენილებას გავეცანით. არსებითი განხილვების დროს ჩვენ სასამართლოს დარწმუნებას ვეცდებით, რომ ჩემი დაცვის ქვეშ მყოფი ნამდვილად უდანაშაულოა და ის აშველებდა“, – აცხადებს ადვოკატი გიორგი გოგინავა.
ვახტანგ ბერძენიძეს ბრალი ორი, მუხლით აქვს წარდგენილი, რომლებიც გულისხმობს ჯგუფურად ჯანმრთელობის დაზიანებას რასაც მოყვა სიცოცხლის მოსპობა და ასევე მას ბრალი წარდგენილი აქვს ჯგუფურად ცემის მუხლით.