ძმები გიორგი და დავით ფეიქრიშვილების მკვლელობის დამკვეთი სავარაუდოდ უკრაინაში მცხოვრები კრიმინალური ავტორიტეტი ვატო ყიფიანია, ხოლო შეკვეთილი მკვლელობის მთავარი მოტივი 2016 წელს, ვაკეში მომხდარ მკვლელობას უკავშირდება. საუბარია ბადუკა ნათობაძეზე, რომელმაც საკუთარ მანქანაში სოსო ჯოხაძე ჩაცხრილა. სწორედ სოსო ჯოხაძის საახლობლო წრიდან არის ვატო ყიფიანი.
რაც შეეხება ბადუკა ნათობაძეს, მისი უახლოესი გარემოცვიდან არიან ტყუპი გიორგი და დავით ფეიქრიშვილები. როგორც „ქრონიკას“ კონფიდენციალურმა წყარომ განუცხადა, სწორედ ამ მკვლელობის შემდეგ დაიგეგმა შურისძიება ძმები ფეიქრიშვილების ლიკვიდაციით. თუმცა ამ ინფორმაციას ჯერჯერობით არც ერთი მხარე არ ადასტურებს.
ვატო ყიფიანის უფლებადამცველი, რომელსაც „ქრონიკა“ დაუკავშირდა, არ ამბობს რომელ ქვეყანაში იმყოფება ის. მან სასჯელაღსრულების დაწესებულება 2008 წელს დატოვა და მას შემდეგ ის საქართველოში არ იმყოფება.
„ქრონიკის“ ინფორმაციით, ვატო ყიფიანს, როგორც მკვლელობის დამკვეთს ასახელებს სახელმწიფო უსაფრთხოების სამსახურის გამოძიების ფარგლებში გამოკითხული ერთ-ერთი პირი. ფეიქრიშვილების ადვოკატი ამბობს, რომ ძმების აფეთქება სხვადასხვა ადგილას იგეგმებოდა და ერთ-ერთი ლოკაცია იყო ის ადგილი, სადაც ერთ-ერთი ძმა ოჯახთან ერთად უნდა ყოფილიყო.
სახელმწიფო უსაფრთხოების სამსახურის კონტრტერორისტულმა ცენტრმა და უკრაინის უსაფრთხოების სამსახურმა, თბილისში დაგეგმილი, აფეთქებით ორი პირის შეკვეთილი მკვლელობა აღკვეთეს. სუსმა ჯამში შვიდი ადამიანი დააკავა, მათ შორის ოთხი დააკავეს ბათუმში, მათგან რამდენიმე განმაღმველია და არ არის გამორიცხული, რომ რომელიმე მათგანი ძალოვანი უწყების ყოფილი თანამშრომელი იყოს.