არსებობს საერთაშორისო სტანდარტები და არსებობს ეროვნული სტანდარტები. ჩვენ ძალიან ბევრი ეკონომიკური სექტორის და აქტივობის მიმართ შევიმუშავეთ და გამოვეცით ქმედითი გაიდლაინები, სადაც ზუსტადაა გაწერილი, როგორ უნდა იმუშაოს ამა თუ იმ ობიექტმა, ოფისმა, მაღაზიამ და წარმოებამ- ამის შესახებ ეკონომიკის მინისტრმა იმედის გადაცემა „ღია ეთერში“ განაცხადა.
ნათია თურნავას თქმით, ეს არ არის მიუღწეველი სტანდარტები. „აქ საუბარია ელემენტარული უსაფრთხოების წესების დაცვაზე. დაწყებული დისტანცირებიდან, სადაც ეს შესაძლებელია. ასევე პირადი დაცვის საშუალებების სწორი გამოყენება, პერიოდული დეზინფექცია, თერმოსკრინინგი“- განაცხადა ნათია თურნავამ.
რაც შეეხება ტურიზმს, მისი თქმით, ამ მიმართულებას ბევრი რამ დაემატება. „აქაც წესები და პრინციპები იქნება იგივე, თუმცა მხოლოდ პირბადე და ხელთათმანები არ კმარა. აქ უფრო სხვა ტექნოლოგიები ჩაერთვება. ესენია საზღვარზე გადამოწმება, ქვეყნებს შორის შეთანხმება, თუ როგორ იზღვევა ეს რისკები და ა.შ“– აღნიშნა ნათია თურნავამ.