გიორგი შაქარაშვილის საქმეზე ბრალდებული „მერსედესის“ მძღოლის, ძიუდოისტ გიორგი ტატიაშვილის ადვოკატის, გიორგი ყიფშიძის განცხადებით, მისი დაცვის ქვეშ მყოფი იმედიანადაა და თავს მხნედ გრძნობს.
ის „პრაიმტაიმთან“ საუბრისას არ გამორიცხავს, რომ საქმეში მესამე მანქანაც ფიგურირებდეს.
„ბუნებრივია, განიცდის, მაგრამ თავს მხნედ გრძნობს. დღეს ფსიქოლოგიურად გაამხნევეს. ავუხსენით სიტუაცია, რომ საქმეში რეალურად მის წინააღმდეგ, არაფერი არ არსებობს. მიუხედავად იმისა, რომ დიდია, მაინც ბავშვია. იმედები აქვს. თავის სიმართლეში დარწმუნებულია. ყველა კითხვა გადავამოწმეთ მასთან. რკინის ჯოხზეც იყო საუბარი. სასაცილოა, ევროპის ჩემპიონს მანქანით დააქვს რკინის ჯოხი. როგორც უწერია ჩვენებაში, რკინის ჯოხი იმ პიროვნებას ჰქონდა. სამწუხაროდ, იმას მანქანაში ისე ედო, ვერ ხედავდა. სავარაუდოდ, შარვალში ჰქონდა ჩადებული. არ დამინახავს, მაგრამ რომ გადადიოდა თან ამოიღოო.
ის ტიპები, ვინც მაგის მანქანაში ჩასხდნენ, სინამდვილეში, „ტოიოტაში“ უნდა ყოფილიყვნენ. იქ, რომ ვერ ჩაეტივნენ, იმიტომ სთხოვეს, ამას, რომ ორი ბიჭი მცხეთაში ჩაეყვანა. არ არის გამორიცხული, რომ საქმეში მესამე მანქანაც იყო. თუმცა, ამან ეს არ იცის,“ – განაცხადა ადვოკატმა.
მისივე თქმით, რამდენიმე დღეში საგამოძიებო ექსპერიმენტს ჩაატარებენ, რომელიც სავარაუდო სიტუაციას აღადგენს.
„ვაგროვებთ ინფორმაციას, რომ ადგილზე ყველა დეტალი გავიაროთ და მაქსიმალურად აღვადგინოთ სრული სურათი. 100%-ით შეიძლება ვერა, მაგრამ ის მაინც გვეცოდინება, ვინ და საიდან ჩავიდა. მაგალითად, რა უნდოდა ამირხანაშვილს ხიდის ბოძთან და ჩანთასთან? როცა კაცი ამბობს, რომ ბუჩქებში ვიჯექიო. იქიდან ის ვერაფერს დაინახავდა. ეს გამორიცხულია. ვერც შაქარაშვილს. გაგონებით კი, შეიძლებოდა გაეგო,“ – განუცხადა „პრაიმტაიმს“ გიორგი ყიფშიძემ.
ფეხბურთელ გიორგი შაქარაშვილის საქმეზე 17 დაკავებულს შორის ერთ-ერთი ძიუდოისტი და ჭაბუკებს შორის ევროპის ჩემპიონი გიგა ტატიაშვილია.
შეგახსენებთ, რომ 23 ივნისს, 19 წლის გიორგი შაქარაშვილის ცხედარი 4-დღიანი ძებნის შემდეგ მაშველებმა მდინარე არაგვში იპოვეს.
19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები.