თბილისის საქალაქო სასამართლოში 15 წლის ლუკა სირაძის გარდაცვალების საქმესთან დაკავშირებით დაკავებული გამომძიებლის, მარიანა ჩოლოიანის სასამართლო პროცესზე მტკიცებულებები განიხილეს. პროცესზე დღეს 6 საათნახევრიანი ვიდეომასალა გამოიკვლიეს. პროკურორ ლევან ქუთათელაძის თქმით, ექვსსაათიანი ვიდეო, რომელიც ლუკა სირაძის პოლიციაში ყოფნის სრულ პერიოდს ასახავს, სხვა მტკიცებულებებთან ერთად ადასტურებს მარიანა ჩოლოიანის მხრიდან ჩვენების მიცემის იძულების 2 ეპიზოდს.
“ ვიდეომასალაში აღწერილია სრული პროცესი. მოგეხსენებათ, არასრულწლოვანი ლუკა სირაძე დაახლოებით 6 საათნახევრის განმავლობაში იმყოფებოდა პოლიციის განყოფილებაში, სადაც მარიანა ჩოლოიანის მხრიდან მის მიმართ განხორციელდა ჩვენების მიცემის იძულება. ვიდეოჩანაწერი რამდენიმე რაკურსით გადაღებულია, რომელსაც ხმა არ აქვს, ეს არის მხოლოდ გამოსახულება. ის სხვა მტკიცებულებებთან ერთად ადასტურებს, რომ ბრალდებულმა ნამდვილად ჩაიდინა ჩვენების მიცემის იძულების ორი ეპიზოდი”, – განაცხადა პროკურორმა.
დაცვის მხარე არ ეთანხმება ბრალდებას და გამორიცხავს, რომ ზეწოლას ან რაიმე სახის დაპირისპირებას ჰქონდა ადგილი.
შემდეგი სასამართლო პროცესი 17 აგვისტოს, 11:00 საათზე დაინიშნა.