NHK-ის ცნობით, ტოკიოში მზის დარტყმის შედეგად 14 ადამიანი დაიღუპა.
გარდაცვლილიდან ცხრა ადამიანი 80 წელზე მეტი ასაკის იყო. მთლიანობაში, აგვისტოში სიცხის შედეგად დაიღუპა ტოკიოს 26 მაცხოვრებელი.
13 აგვისტოს, იაპონიის გენერალური სახანძრო დეპარტამენტი, რომელიც ასრულებს საგანგებო სიტუაციების და სასწრაფო დახმარების სამსახურის ფუნქციებს, 3-დან 9 აგვისტომდე ქვეყანაში სიცხის შედეგად ათი დაღუპულისა და 6.6 ათასი დაზარალებულის შესახებ განაცხადა. ამასთან დაკავშირებით, იაპონიის ხელისუფლებამ გააფრთხილა მოქალაქეები, რომ ცხელ დღეებში მოერიდონ გარეთ გასვლას და მიიღონ ბევრი სითხე.
მიმდინარე კვირა იაპონიაში ყველაზე ცხელი აღმოჩნდა ამ ზაფხულის განმავლობაში. ზოგიერთ რაიონში, ტემპერატურა დღის განმავლობაში 38 გრადუსზე მაღლა ავიდა, ხოლო 11 აგვისტოს გუნმას ცენტრალურ პრეფექტურაში, ჰაერის ტემპერატურა დღის მეორე ნახევარში 40.1 გრადუსამდე ავიდა.