პარლამენტის თავდაცვისა და უშიშროების კომიტეტის თავმჯდომარე, ირაკლი სესიაშვილი “ღამის კურიერის” ეთერში, დავით ბაქრაძის განცხადებას ეხმაურება. საუბარია “ევროპული საქართველოს“ ლიდერის განცხადებაზე, სადაც ის ევროსაბჭოს რეზოლუციაზე საუბრობს, რომელსაც 2008 წლის აგვისტოს ომის შემდეგ, წინა ხელისუფლების საპარლამენტო გუნდმა მოაწერა ხელი.
დავით ბაქრაძე ამბობს, რომ ეს ფაქტი მათი მხრიდან კომპრომისი იყო და არა საქართველოს ღალატი, რათა დოკუმენტში გაჩენილიყო სიტყვა ოკუპაცია, რომელიც რუსეთის ქმედებებს ასახავდა.
“გუშინ ბატონმა ბაქრაძემ ღალატს, ქვეყნის ღალატს დაარქვა კომპრომისი. ბატონი ბაქრაძე გვიმტკიცებდა, რომ თურმე საერთაშორისო სამართლით დადგენილი ფაქტისთვის, ოკუპაციისთვის, ოკუპაციის აღიარებისთვის საჭირო გახდა იმის ჩაწერა ამ რეზოლუციაში, რომ ჩვენმა სამხედროებმა ცხინვალი დაბომბეს. ეს არის მათი კომპრომისი.
ჰკითხეთ ბაქრაძეს, რა კომპრომისს უწოდებს ადამიანების წამებას, ქონებების ჩამორთმევას, მედიის ფეხქვეშ გათელვას. ალბათ, აქაც აქვთ პასუხი, რომ ესეც გარკვეული კომპრომისი იყო. მათი კომპრომისის ადგილი მომავალში არ არის,” – განაცხადა ირაკლი სესიაშვილმა.