2012 წლიდან მოყოლებული ჩვენ ძალიან ბევრ გამარჯვებას მივაღწიეთ და ეს მხოლოდ და მხოლოდ ერთობით, ერთიანი ძალისხმევით იყო შესაძლებელი. დარწმუნებული ვარ არჩევნებში, რომელიც ახლოვდება, ჩვენ შევძლებთ გავიმარჯვოთ ერთად, ერთად საქართველოს წარმატებისთვის, – ასე მიმართა პარტია „ქართული ოცნების” გენერალურმა მდივანმა კახა კალაძემ ქედის მუნიციპალიტეტის მცხოვრებლებს, სადაც მმართველი პარტიის მიერ ხულოს, შუახევის, ქედისა და ხელვაჩაურის მაჟორიტარი დეპუტატობის კანდიდატის ანზორ ბოლქვაძის და აჭარის ა/რ უმაღლესი საბჭოს მაჟორიტარი დეპუტატობის კანდიდატის ფრიდონ ფუტკარაძის წარადგენს.
მისივე თქმით, ქედის მუნიციპალიტეტში, ისევე, როგორც, მთლიანად მაღალმთიან აჭარაში მცხოვრები ადამიანების მიმართ დამოკიდებულება ფუნდამენტურადაა შეცვლილი უკეთესობისკენ.
„ჩემთვის დიდი პატივია მოგმართოთ თქვენ, თავისუფალ, დაუღალავ, ენერგიულ და შეუპოვარ ადამიანებს, რომლებიც ყოველდღიურად ეზიარება ფლორისა და ფაუნის ამ საოცრებას, ინარჩუნებთ და უფრთხილდებით წინაპართა დანატოვარს, ტრადიციებს, ამავდროულად კი ყოველდღიურად იღწვით თქვენი ოჯახების, კუთხისა და ჩვენი ქვეყნის უკეთესი მომავლისათვის.
ალბათ, ყველანი დამეთანხმებით, რომ „ქართული ოცნების“ ხელისუფლებაში მოსვლის დღიდან, წინა ხელისუფლებისგან განსხვავებით, ქედის მუნიციპალიტეტში, ისევე, როგორც, მთლიანად მაღალმთიან აჭარაში მცხოვრები ადამიანების მიმართ დამოკიდებულება ფუნდამენტურადაა შეცვლილი უკეთესობისკენ. დღეს, ისე, როგორც არასდროს, ხელისუფლებისგან განსაკუთრებული ყურადღება გექცევათ და ყველაფერი კეთდება იმისათვის, რომ სახელმწიფო სიკეთეებისგან თითოეულმა თქვენგანმა მაქსიმალური სარგებელი მიიღოთ.
გასული წლებში განმავლობაში, მნიშვნელოვნად გაიზარდა ხელისუფლების მიერ როგორც ქედის მუნიციპალიტეტის დაფინანსება, ისე განხორციელებული პროგრამებისა და პროექტების რაოდენობა. ამ ძალისხმევის, მათ შორის მასშტაბური ინფრასტრუქტურული პროექტების შედეგად, საგრძნობლადაა გაზრდილი ამ მხარის ტურისტული პოტენციალი და ამ სექტორიდან მოსახლეობის მიერ მიღებული შემოსავალი. ხელისუფლების გათვლებითა და ხელშეწყობით, ტურიზმის სფეროდან მიღებული შემოსავალი კიდევ უფრო უნდა გაიზარდოს, რადგან მხარე განსაკუთრებულად გამორჩეულია ამ ულამაზესი ბუნებით, უნიკალური გასტრონომიული კულტურითა და ავთენტურობით, რაც ტურიზმის განვითარებისათვის ნაყოფიერ ნიადაგს წარმოადგენს”, – განაცხადა კალაძემ.
მისივე თქმით, მიღწევებისა და წინ გადადგმული ნაბიჯების მიღმა, არსებობს პრობლემები და გამოწვევები.
„რა თქმა უნდა, ჩვენ ყველა მიმართულებით გვაქვს მიღწევები, წინ გადადგმული ნაბიჯები, განხორციელებული პროგრამები, ავიღოთ: ჯანდაცვა, სოფლის მეურნეობა, განათლება, მაგრამ, რა თქმა უნდა, ყველა ვთანხმდებით იმაზე და ყველას კარგად გვესმის, რომ არსებობს პრობლემებიც და გვაქვს გამოწვევებიც. რა თქმა უნდა, ერთიანი ძალისხმევით შესაძლებელია ყველა პრობლემისა და გამოწვევის გადალახვა“, – განაცხადა კალაძემ.