ნათია ფანჯიკიძე სოციალურ ქსელში ვატიკანის საელჩოსთან გამართულ აქციას ეხმაურება.
“გვინდა ეს თუ არა, რელიგია არასდროს ყოფილა მხოლოდ სულის საკუთარი, ინტიმური საკითხი, ყოველთვის იყო და არის პოლიტიკა, ყოველთვის მიბმულია სახელმწიფოებრიობასთან. გვინდა, რომ საქართველო მონაწილეობდეს დიდი პოლიტიკის შემოქმედებაში და ბალანსში და არ დავფრიალებდეთ, საითაც ქარი გადაგვაგდებს, არამედ რაღაცაში თავად ვერკვეოდეთ და ვწყვეტდეთ? მაშინ უნდა გვიხაროდეს მნიშვნელოვანი სტუმრები. ეს “საპატიო დახვედრა” რუსული პროვოკაციაა. მსოფლიოსგან ჩვენი იზოლაცია აწყობთ მხოლოდ რუსებს. კიდევ სხვა ტრაგედიაა, რომ ქართული აღარაფერი გვაქვს, – “დღეს სტუმარია ის ჩემი, გინდ ზღვა ემართოს სისხლისა” – კავკასიური მორალი ესაა, მაგრამ სადღაა? მითუმეტეს, თუ წვეთი სისხლი არ მართებს სტუმარს.
გარდა თავისთავად მსოფლიოს ქვეყნებს შორის კომუნიკაციისა, რაც ყოველთვის აუცილებელია, ტერორიზმის ეპოქაში არა მხოლოდ ქრისტიანულს, – ყველა რელიგიის და კონფესიის მაღალ სასულიერო პირებს ძალიან ბევრი აქვთ სამსჯელო. ერთი და ორი აქეთ-იქით ვიზიტი კი არა, ინტენსიური უნდა იყოს შეხვედრები და კონსულტაციები ერთმანეთთან. კარგი იქნება, ქართული წესის მიხედვით თუ მოვიქცევით და დავხდებით სტუმრებს ისე, როგორც გვეკადრება.”