პირველი გამოჯანმრთელებულის შემდეგ, კლინიკა „ბომონდის“ კოვიდცენტრი კიდევ სამმა მოზარდმა დატოვა.
მოზარდები კლინიკიდან ბინაზე უკვე გაეწერნენ. თითოეულ მათგანს თვითიზოლაციის რეკომენდაცია მიეცა.
„სამმა პაციენტმა დატოვა „კლინიკა ბომონდი“ კლინიკური სიმპტომატიკის გარეშე. სამივე მათგანი ქუთაისის მკვიდრია. ამ დროისათვის ჩვენს სტაციონარში 14 ბავშვია მოთავსებული. თითოეულ მათგანს კორონავირუსი დადასტურებული აქვს, თუმცა უსიმპტომო პაციენტები არიან. გვყავს პაციენტები ქუთაისიდან, ქობულეთიდან, ბათუმიდან და ვანიდან. დამატებით ველოდებით კიდევ რამდენიმე პაციენტის გამოჯანმრთელებას. უკვე გაწერილ პაციენტებს ეძლევათ თვითიზოლაციის რეკომენდაცია. ასევე, აუცილებელია დაიცვან ჰიგიენა, დისტანცია და ატარონ ნიღაბი“, – განაცხადა „კლინიკა ბომონდის“ პედიატრიული განყოფილების ხელმძღვანელმა ედიშერ ასათიანმა.
„კლინიკა ბომონდის“ კოვიდცენტრში ამ დროისათვის 90-მდე პაციენტია მოთავსებული. პაციენტებს შორის ერთი ოჯახის რამდენიმე წევრია, ასევე, 9 ორსული და ერთი მელოგინე.
ამ დროისთვის საქართველოში კორონავირუსის 4 140 შემთხვევაა დადასტურებული, გამოჯანმრთელებულია 1643 ადამიანი, 25 პაციენტი კი გარდაიცვალა.