მთავრობა მასშტაბური შეზღუდვების დაწესებას არ აპირებს. განცხადება ამის შესახებ პრემიერმინისტრმა მთავრობის სხდომის დაწყებამდე გააკეთა. გიორგი გახარია ამბობს, რომ იმ შემთხვევაში თუ შეზღუდვები დაწესდება, ეს იქნება წერტილოვანი და მიზნობრივი შეზღუდვები. გარდა ამისა, გახარიას თქმით, უნდა ადღდგეს სასწავლო პროცესი და “ბავშვები საკლასო ოთახებს უნდა დაუბრუნდნენ”, თუმცა უფრო კონკრეტულ გადაწყვეტილებას ამასთან დაკავშირებით დღეს საკოორდინაციო საბჭო მიიღებს.
გიორგი გახარიას თქმით, ეპიდემიოლოგიური ვითარება ქვეყანაში რთულია, რაც მოსალოდნელიც იყო. პრემიერი კორონავირუსთან ბრძოლის ყველა მიმართულებით კმაყოფილია და ამბობს, რომ მთავრობამ აქამდე გატარებული ყველა ღონისძიებით დრო მოიგო. მისივე თქმით, ქვეყანაში ყოველდღიურად საშუალოდ 9 ათასი ტესტი ტარდება, მაშინ როცა მარტში მხოლოდ 200 ტესტი ტარდებოდა და ლუგარის ლაბორატორიის გარდა, კიდევ 22 ლაბორატორია აკეთებს ანალიზს.
გიორგი გახარიას თქმით, ეფექტურია მიდგომა, რომელიც მსუბუქი და უსიმპტომო პაციენტების სახლში, ან კარანტინში მკურნალობას გულისხმობს. მთავრობის მეთაური ისევ მოსახლეობას მიმართავს და პირბადეების ტარებისკენ, ჰიგიენის დაცვისა და დისტანციის დაცვისკენ მოუწოდებს. რაც შეეხება ჯანდაცვის სისტემას, გახარია ამბობს, რომ ტიკარაძის უწყება ყველა გამოწვევას ეფექტურად უმკლავდება