დღეს ერთ-ერთი ოპოზიციური ტელევიზიის წარმომადგენელმა თქვა, რომ „ქართული ოცნების“ საარჩევნო სპეციალისტმა ეს დაზიანებები ავარიის შედეგად მიიღო – ეს ისეთი სირცხვილია, რომ ამის იქით არაფერი არსებობს, – ამის შესახებ „ქართული ოცნების“ აღმასრულებელმა მდივანმა, ირაკლი კობახიძემ განაცხადა.
„მე დარწმუნებული ვარ, რომ უახლოეს დღეებში ჩვენ ვიხილავთ ადამიანებს გისოსებს მიღმა. მოვუწოდებთ სამართალდამცავ ორგანოებს, რომ ვინც აწყობს პროვოკაციებს, ამას არ აქვს არანაირი გამართლება, მითუმეტეს მედიასაშუალებების წარმომადგენლების მიმართ, ამიტომ რეაგირება უნდა იყოს საკმარისად მკაცრი, კანონის ფარგლებში. მექნება ერთი თხოვნა მედიასთან – დღეს ერთ-ერთი ოპოზიციური ტელევიზიის წარმომადგენელმა თქვა, რომ „ქართული ოცნების“ საარჩევნო სპეციალისტმა ეს დაზიანებები ავარიის შედეგად მიიღო – ეს ისეთი სირცხვილია, რომ ამის იქით არაფერი არსებობს. მესმის მიკერძოებულობაც, პარტიული ინტერესებიც, მაგრამ ეს ისეთი ტყუილია, რაც არც ერთმა ჟურნალისტმა არ უნდა იკადროს“, – განაცხადა კობახიძემ.
„ქართული ოცნების“ საარჩევნო სპეციალისტს, თემურ შუბითიძეს, რომელიც მარნეულში, სამსახურში მიდიოდა, გზაში სასტიკად გაუსწორდნენ. არსებული ინფორმაციით, უცნობმა პირებმა მის ავტომობილს მანქანა განზრახ შეაჯახეს, რის შემდეგაც სამმა პირმა მას სასტიკად სცემა.