სომხეთსა და აზერბაიჯანს შორის ვითარება კვლავ დაძაბულია. სომხური მხარის განცხადებით, ღამის განმავლობაში საჰაერო თავდაცვის ძალებმა სომხეთის საჰაერო სივრცეში 4 უპილოტო საფრენი აპარატი ჩამოაგდეს. ერევანში აცხადებენ, რომ საფრენი აპარატებიდან აზერბაიჯანულმა მხარემ სომხეთის სოფლების მიმართულებით ცეცხლი გახსნა, რასაც მსხვერპლი მოჰყვა.
ოფიციალური ბაქოს ცნობით, კი სომხეთი აზერბაიჯანულ პოზიციებზე შეტევას განაგრძობს. აზერბაიჯანის თავდაცვის უწყების მონაცემებით, გასულ ღამეს სომხური მხარის 5 ჯავშანმანქანა, 3 სამხედრო ინფრასტრუქტურული ობიექტი და პირადი შემადგენლობის დიდი რაოდენობა გაანადგურეს. 11 დაღუპული მშვიდობიანი მოქალაქისა და 60-ზე მეტი დაჭრილის შესახებ ინფორმაციას ავრცელებს არაღიარებული მთიანი ყარაბაღის ომბუდსმენი.
ევროკავშირი კონფლიქტის მონაწილე მხარეებს მთიან ყარაბაღში საბრძოლო მოქმედებების დაუყოვნებლივი შეწყვეტისა და პოლიტიკური დიალოგის განახლებისკენ მოუწოდებს.