სოცქსელებში მარტივია დეზინფორმაციის გავრცელება. თუმცა, სწორ, ოფიციალურ და რეალურ ამბებსაც უნდა მივაპყროთ ყურადღება. საქართველოში სომხეთის საელჩო, ელჩი რუბენ სადოიანი ავრცელებენ ოფიციალურ განცხადებას, რომ ჩვენი ქვეყნიდან არ ხდება აზერბაიჯანისადმი იარაღის ტრანზიტული მიწოდება, – წერს Facebook-ის საკუთარ გვერდზე ანალიტიკოსი გია აბაშიძე.
“სამცხე-ჯავახეთის აჟიტირებულნო აქტივისტებო, რომლებმაც დიდი ალბათობით, ნაციონალურმა პროვოკაციულმა მოძრაობამ შეცდომაში შეგიყვანათ, დაიჯერეთ სომხეთის დიპლომატიური წარმომადგენლობის განცხადება! მშვიდობა, ჯანმრთელობა და განვითარება სამეზობლოს“ – წერს გია აბაშიძე.
ინტერნეტში გავრცელებული ვიდეო, რომლის თანახმადაც, თითქოს სამხედრო აღჭურვილობა, რომელიც ბორჯომშია გადაღებული, აზერბაიჯანს გადაეცემა.
„სამხედრო აღჭურვილობა, რომელიც ვიდეოშია ნაჩვენები, ეკუთვნის საქართველოს შეიარაღებულ ძალებს და გადაადგილება ხორციელდებოდა საქართველოს უსაფრთხოების ინტერესებიდან გამომდინარე. სომხეთის წარმომადგენლობა საქართველოში მოუწოდებს მოქალაქეებს, თავი აარიდონ დეზინფორმაციის გავრცელებას, რასაც შეიძლება, პანიკა და არასასურველი შედეგები მოჰყვეს“ – აცხადებენ საქართველოში სომხეთის საელჩოში.
ამავე საკითხს გუშინ გამოეხმაურა საქართველოს სახელმწიფო უსაფრთხოების სამსახურის უფროსი, გრიგოლ ლილუაშვილი.
„მინდა გამოვეხმაურო სოციალურ მედიაში გავრცელებულ დეზინფორმაციას თითქოს თურქეთის ტერიტორიიდან, აზერბაიჯანის მიმართულებით, სირიაში მიმდინარე საბრძოლო მოქმედებებში მონაწილე არაფორმალური შეიარაღებული ფორმირებები თითქოსდა საქართველოს ტერიტორიის გავლით გადააადგილდებიან. ასევე ვრცელდება ინფორმაცია იმის შესახებ, რომ ხელი შეუშალონ ჩვენს კონკრეტულ მუნიციპალიტეტებში მშვიდობიან თანაცხოვრებას და კეთდება კონკრეტული მოწოდებები, რომ აზერბაიჯანის მიმართულებით მიმავალი საავტომობილო მაგისტრალი გადაიკეტოს. მინდა ხაზგასმით აღვნიშნო, რომ მებრძოლებთან დაკავშირებულ გავრცელებულ ინფორმაციას არანაირი საფუძველი არ გააჩნია, ეს არის სიცრუე და მიზნად ისახავს საქართველოში და ზოგადად რეგიონში ვითარების ესკალაციასა და დაძაბვას“ – აღნიშნა გრიგოლ ლილუაშვილმა.