აშშ-ის კოვიდინფიცირებულ პრეზიდენტს, დონალდ ტრამპს დექსამეტაზონით მკურნალობენ. ამის შესახებ BBC თეთრი სახლის მეთაურის მკურნალ ექიმზე დაყრდნობით წერს.
გამოცემის ინფორმაციით, დექსამეტაზონი სტეროიდია, რომელსაც COVID-19-ის მძიმე ან კრიტიკული მიმდინარეობის შემთხვევებში მკურნალობისას იყენებენ, რადგან ის ფილტვებს ფუნქციონირებაში ეხმარება. ამის მიუხედავად, ექიმი შონ კონლი აცხადებს, რომ სავარაუდოდ ტრამპს უოლტერ რიდის სამედიცინო ცენტრიდან ორშაბათს გაწერენ, რის შემდეგაც პრეზიდენტი მკურნალობას თეთრ სახლში განაგრძობს.
ბრიფინგზე ექიმმა ასევე განაცხადა, რომ ტრამპის ჟანგბადის დონე ორჯერ დაეცა – ერთხელ 94, მეორედ კი 93%-მდე. პრეზიდენტი დამატებითი ჟანგბადის მიღებაზე უარს აცხადებდა, თუმცა ექიმებმა ის ამის საჭიროებაში მაინც დაარწმუნეს.
ამასთან, კონლიმ აღნიშნა, რომ პრეზიდენტი თავს კარგად გრძნობს.
2 ოქტომბერს აშშ-ის პრეზიდენტს დონალდ ტრამპსა და მის მეუღლეს კორონავირუსი დაუდასტურდათ. კოვიდინფექცია დაუდგინდა ტრამპის მრჩეველსაც. დონალდ ტრამპი უოლტერ რიდის სახელობის ეროვნულ სამხედრო-სამედიცინო ცენტრში პრევენციის მიზნით გადაიყვანეს.