აზერბაიჯანული მედიის ინფორმაციით, დღეს დილით სომხეთმა კიდევ ერთხელ მიიტანა სარაკეტო იერიში აზერბაიჯანზე. ყარაბაღთან ახლოს მდებარე დასახლებებთან ერთად დაიბომბა ქალაქი განჯაც.
აზერბაიჯანის ხელისუფლების ინფორმაციით, აზერბაიჯანულ დასახლებებზე, მათ შორის, განჯაზე სარაკეტო იერიში 4 ოქტომბერსაც მიიტანეს. განჯას დაბომბვისას დაიღუპა ერთი მოქალაქე, 30-ზე მეტი კი დაშავდა. აზერბაიჯანულ მედიაში გავრცელდა ფოტო და ვიდეომასალაც, სადაც დანგრეული შენობები ჩანს. ბაქოს მტკიცებით, ზალპური ცეცხლის რეაქტიული სისტემა „სმერჩის“ რამდენიმე რაკეტა მინგეჩაურის დასახლებაში ჰიდროელექტროსადგურთანაც ჩამოვარდა. გავრცელდა ფოტოებიც, სადაც ბაქოს მტკიცებით, ორი ჩამოვარდნილი რაკეტა ჩანს ელექტროსადგურთან, რომლებიც არ აფეთქდა.
ჯერჯერობით დღევანდელი იერიშის მიტანაზე ინფორმაციას არ ავრცელებს მთიანი ყარაბაღის დე ფაქტო ხელისუფლება. რაც შეეხება აზერბაიჯანული დასახლებების გუშინდელ დაბომბვას, მთიანი ყარაბაღის დე ფაქტო ხელისუფლების გავრცელებული განცხადებით, მათ იერიში მიიტანეს აზერბიაჯანის სიღრმეში მდებარე სამხედრო ობიექტებზე და არა დასახლებულ პუნქტებზე. დასახლებულ პუნქტებზე, მათ შორის, მინგეჩაურზე თავდასხმას უარყოფს სომხეთის ხელისუფლებაც.
თავის მხრივ, თვითგამოცხადებული რესპუბლიკის დე ფაქტო ხელისუფლება აცხადებს, რომ გუშინ აზერბაიჯანმა დაბომბა მათი დედაქალაქი ხანქენდი/სტეფანაკერტი. ინტერნეტში გავრცელა ვიდეოკადრებიც, სადაც სომხური მედიის ინფორმაციით, ქალაქის დაბომბვა ჩანს.
ერთკვირიანი დაპირისპირების შემდეგ აზერბაიჯანმა, როგორც ჩანს პირველად, სომხური პოზიციების მნიშვნელოვანი გარღვევაც შეძლო. აზერბაიჯანის ხელისუფლების მტკიცებით, შაბათ-კვირას მათ უკან დაახევინეს მოწინააღმდეგეს და სტრატეგიულად მნიშვნელოვანი ადგილები დაიკავეს.
მათ შორისაა ჯაბრაილის დასახლება, რომელშიც ყარაბაღის პირველ კონფლიქტამდე რამდენიმე ათასი აზერბაიჯანელი ცხოვრობდა, დღესდღეობით კი მიტოვებულია. ჯაბრაილი, რამდენიმე სოფელთან ერთად, აზერბაიჯანელებმა ფრონტის სამხრეთ-აღმოსავლეთიდან გარღვევის შემდეგ აიღეს. დასახლება რეგიონის სამხრეთ ნაწილში მდებარეობს.