ყველა პაციენტი ხვდება ექიმთან, არც ერთი არ რჩება ექიმის გარეშე და ექიმის გადაწყვეტილებით, პაციენტთა ნაწილი, უსიმპტომოები, რჩებიან ბინაზე და იქ ხდება მათი მონიტორინგი, ნაწილი მკურნალობს სასტუმროს ტიპის დაწესებულებებში და საშუალო, მძიმე და კრიტიკულად მძიმე პაციენტები კლინიკებში მკურნალობენ. ამ მიდგომამ, გარკვეულწილად, კლინიკები განტვირთა და დღეს კლინიკებში საწოლების რაოდენობა საკმარისია იმისთვის, რომ მიიღონ ყველა პაციენტი, ვინც ამას საჭიროებს, – ამის შესახებ ინფექციური პათოლოგიის, შიდსისა და კლინიკური იმუნოლოგიის ცენტრის დირექტორმა, თენგიზ ცერცვაძემ ტელეკომპანია „მაესტროს“ ეთერში საუბრისას განაცხადა.
„ბოლო 2-3 კვირის განმავლობაში, ადგილი აქვს სერიოზულ მატებას. ეს იყო მოსალოდნელი და გარდაუვალი, რამეთუ, ქვეყანაში მოიხსნა შიდა შეზღუდვები, შემსუბუქდა რეგულაციები, გაიზარდა მობილობა, იყო ზაფხული პერიოდი. აჭარის რეგიონს ძალიან ბევრი ადამიანი სტუმრობდა და სწორედ იქ გაჩნდა ძირითადი კერა, რომელიც შემდეგ გავრცელდა დანარჩენ ქვეყანაში. ახალი მონაცემები კარგი არაა, მაგრამ შემაშფოთებელი კატეგორიულად არაა, რადგან ქვეყანა მას მთლიანად მართავს, კონტროლქვეშაა შემთხვევათა მატება, ყველა თვალსაზრისით, გარდა 2-3-კვირიანი მოკლე პერიოდისა, რომელიც იყო სექტემბერში აჭარაში, როცა, გარკვეული დროით, ადგილი ჰქონდა შეფერხებებსა და ჩავარდნებს. მხედველობაში მაქვს ლაბორატორიული ტესტების პასუხის დაგვიანების შემთხვევები, რასაც შემდეგ დაგვიანებული ჰოსპიტალიზაცია მოჰყვა და მოსახლეობაში გარკვეული შეშფოთება. ეს ყველაფერი აღმოფხვრილია მდგომარეობა ისევ სტაბილურია, კონტროლდება. მართალია, ახალ შემთხვევათა რაოდენობა საგრძნობია, მაგრამ ყველაფერი კონტროლირებადია. ყველა პაციენტი იღებს გამოკვლევას, ყველას უტარდება ტესტი, შემთხვევათა უმტესობაში, მათთვის შედეგები ცნობილია არაუგვიანეს 48 საათისა. თუ ძალიან შორიდანაა ტესტი ჩამოსატანი, მაშინ 72 საათია მაქსიმუმი. ეს ძალიან ცოტაა იმის გათვალისწინებით, რომ მსოფლიოს წამყვან ქვეყნებში, ზოგჯერ, ერთი ან ორი კვირა ელიან ტესტის პასუხს. ასე რომ, შეშფოთების არავითარი საფუძველი არ არსებობს“, – განაცხადა თენგიზ ცერცვაძემ.