საფრანგეთის შინაგან საქმეთა მინისტრმა, ჟერალდ დარმანენმა განაცხადა, რომ ქვეყანაში კომენდანტის საათის შესრულებას 12 ათასი პოლიციელი და ჟანდარმი გააკონტროლებს.
„12 ათასი პოლიციელი და ჟანდარმი ყოველ ღამე შეზღუდვების შესრულებას გააკონტროლებს. პოლიციელებსა და ჟანდარმებს ვთხოვე, რომ დაწესებული შეზღუდვების შესრულება უზრუნველყონ და სანიტარული წესების დარღვევა აღკვეთონ“, – აღნიშნა ჟერალდ დარმანენმა.
საფრანგეთის პრეზიდენტმა პარიზსა და კიდევ რამდენიმე დიდ ქალაქში კომენდანტის საათი გამოაცხადა.
როგორც ემანუელ მაკრონმა აღნიშნა, კომენდანტის საათი 21:00 სააათიდან 06:00 საათამდე იმოქმედებს და დაახლოებით ერთი თვის განმავლობაში იქნება.
კომენდანტის საათი ილ-დე-ფრანსის რეგიონში, გრენობლში, ლიონში, მარსელში, მონპელიეში, რუანში, ლილში, ტულუზასა და სენტ-ეტიენში 17 ოქტომბრიდან ამოქმედდება.
პანდემიის დაწყებიდან დღემდე საფრანგეთში კორონავირუსის 779 063 შემთხვევა დადასტურდა, ხოლო 33 037 ადამიანი გარდაიცვალა.