მამუკა მდინარაძის თქმით, თუ ოპოზიცია მანდატებზე უარს იტყვის, მე-10 მოწვევის პარლამენტი მაინც უფლებამოსილი იქნება. ამის შესახებ „ქართული ოცნების“ ერთ-ერთმა ლიდერმა პარტიის ოფისში გამართულ ბრიფინგზე განაცხადა. მან ასევე იმედი გამოხატა, რომ ოპოზიცია ასეთ გადაწყვეტილებას არ მიიღებს და დასძინა, რომ ოპონენტების მიერ საპროტესტო აქციის გამართვა და ცესკოს მიერ საბოლოო შედეგების გამოცხადებამდე მათი გაპროტესტება პოლიტიკურ მოუმწიფებლობაზე მიუთითებს, რაზეც უცხოელი დამკვირვებლებიც თანხმდებიან.
„მე რატომღაც მგონია და დარწმუნებული ვარ და უფრო ზუსტად რომ ვთქვათ იმედი მაქვს, რომ ისინი გამოიჩენენ მეტ პასუხისმგებლობას და არ ჩაჰყვებიან ერთმანეთს და განსაკუთრებით „ნაცმოძრაობას“ იმ დესტრუქციულ გეგმაში, რომელიც ჩვენ, რაც არ უნდა ვინმესთვის გასაკვირი იყოს, რამდენიმე დღით ადრე დავაანონსეთ მათგან მიღებული ინფორმაციის საფუძველზე და თან დეტალურად დავაანონსეთ თავისი კონკრეტული ადგილების მითითებით და მე მგონი, ამას მეტი მტკიცებულება არ სჭირდება“, – განაცხადა მდინარაძემ.