მამლის ყივილამდე სამჯერ მოასწრეს ჩატკეპვნა და სერიოზული გალაშქრება გრიგოლ ვაშაძის წინააღმდეგ და შემდეგ, მის ნაცვლად ახსნა-განმარტებაც გამოაქვეყნეს. სააკაშვილმაც კი გამოაქვეყნა ეს ახსნა-განმარტებითი ბარათი, – გრიგოლ ვაშაძის განცხადების შესახებ პარლამენტის თავმჯდომარის მოადგილემ, „ქართული ოცნების“ დიდუბე-ჩუღურეთის მაჟორიტარობის კანდიდატმა, გია ვოლსკიმ ისაუბრა.
„რეალურად, შიგნით რა დაძაბულობაა, რა დაპირისპირებაა, ვერავინ ვერაფერს იტყვის. მოსაზრებები ამასთან დაკავშირებით გრიგოლ ვაშაძეს არ აქვს მხოლოდ. არის პარტიები, არის საზოგადოების გარკვეული ნაწილიც, რომელიც მხარს უჭერს ჩვენს ოპონენტებს და ისინიც სწორედ ასე ფიქრობენ. საბოლოოდ როგორ ინტერპრეტაციას მიიღებს გრიგოლ ვაშაძის ნათქვამი და როგორი პროდუქტი დაიდება ამასთან დაკავშირებით მთლიანად „ნაციონალური მოძრაობის“ მხრიდან, მე ნამდვილად არ ვიცი“, – განაცხადა ვოლსკიმ.
10 ნოემბერს სააგენტო „ნიუპოსტმა“ გრიგოლ ვაშაძის სახელით მისი განცხადება გაავრცელა, სადაც წერია, რომ პროცესები სასწრაფოდ მოლაპარაკების მაგიდასთან უნდა გადავიდეს და ქუჩა ყველა დონის საკანონმდებლო ორგანოს ტრიბუნით ჩანაცვლდეს.
მოგვიანებით, „ნაციონალური მოძრაობის“ თავმჯდომარის ოფიციალურ „ფეისბუქგვერდზე“ ვაშაძის სახელით განცხადება გამოქვეყნდა. რომლის თანახმადაც, თუ მოლაპარაკებები წარმატებით არ დასრულდება, არც მეორე ტურში მიიღებენ მონაწილეობას და არც პარლამენტში შევლენ. განმარტების ეს ტექსტი ვაშაძის „ფეისბუქგვერდზე“ გამოქვეყნებამდე ნიკა გვარამიამ თავის გვერდზე დაპოსტა.
თავად გრიგოლ ვაშაძე მედიასთან ამ დრომდე არ გამოჩენილა.