“მაიკ პომპეოს მოადგილესთან შეხვედრის შემდეგ ჩვენ ვნახეთ საკმაოდ ნირწამხდარი ოპოზიციის წარმომადგენლები”, – ამის შესახებ ანალიტიკოსი, ლევან ნიკოლეიშვილი აცხადებს.
მედიაჰოლდინგ „კვირას“ პრესკლუბში გამართულ პრესკონფერენციაზე ნიკოლეიშვილი საპარლამენტო არჩევნების შემდეგ განვითარებულ მოვლენებს გამოეხმაურა.
„ჭკუას გვარიგებენ ჩვენი დასავლელი პარტნიორები, ცდილობენ – აგვიხსნან პოლიტიკისა და სარჩევნო საკითხებთან დაკავშირებული ანა-ბანა. გაკვეთილებს უტარებენ გარკვეულ პოლიტიკოსთა გამოცდილ ნაწილს, როგორც ისინი თავს უწოდებენ, ეს უფრო სამარცხვინოდ მეჩვენება. პირველი გაკვეთილი ასეთი იყო, რომ როცა არჩევნებში იღებთ მონაწილეობას, ეს ნიშნავს იმას, ეთანხმებით იმ არსებულ კანონმდებლობას, ცესკო-ს იმ შემადგენლობას, რომელიც ატარებს არჩევნებს, მეორე – როცა გადალახავთ ბარიერს, თქვენი ვალდებულებაა უპირველესად იმ ამომრჩევლის წინაშე, რომელმაც მოგცათ ხმა, შეხვიდეთ პარლამენტში და იქედან გააგრძელოთ საქმიანობა, ოპონირება გაუწიოთ სახელისუფლებო პარტიას. მესამე – ბოიკოტი არ არის ის ფორმა, რომლითაც უნდა გადაწყვიტოთ ეს საკითხები.
როგორც ჩანს, ეუთო-სა და სხვა სადამკვირვებლო მისიების წარმომადგენლების შეგონება არ აღმოჩნდა საკმარისი და მაიკ პომპეომ, შეიძლება ითქვას, გააკეთა ძალიან ზრდილობიანი, დიპლომატიური ჟესტი, როცა მან დატოვა თავის მოადგილე საქართველოში რამდენიმე საათით, რათა კიდევ ერთხელ ყოფილიყო ამ გაკვეთილების ახსნა ოპოზიციის წარმომადგენლებისთვის. ამ შეხვედრის შემდეგ ვნახეთ საკმაოდ ნირწამხდარი ოპოზიციის წარმომადგენლები და შეცვლილი ტონი იმის შესახებ, რომ ისინი, თითქოს, მზად არიან მოლაპარაკებებისთვის, თუმცა, კვლავ არ აპირებენ პარლამენტში შესვლას.
ბევრი მათგანი იმეორებს სააკაშვილის, „ნაციონალური მოძრაობის“ ბელადის ნარატივს და ვერ გამოდიან მისი ჩრდილიდან“, – განაცხადა ნიკოლეიშვილმა.